ҶДММ «Фортуна-Ко» дар 5 гектар боғи нави интенсивӣ бунёд менамоянд

ДУШАНБЕ, 10.03.2021 /АМИТ «Ховар»/. Масъулини хоҷагии ёрирасони ҶДММ «Фортуна-Ко», ки дар ноҳияи Бобоҷон Ғафуров ҷойгир аст, тасмим гирифтаанд, ки дар 5 гектар боғи нави интенсивӣ бунёд намоянд. Барои ташкили боғи интенсивӣ аз Туркия ниҳолҳои серҳосилу қадпасти нок, чормағз, зардолу, себу гелос оварда шудаанд. Боғ бо усули қатрагӣ обёрӣ гардида, барои таъминоти об чоҳҳои амудӣ мавриди истифода қарор доранд. Дар 10 гектар замини боқимонда ғалладона, сабзавот ва маҳсулоти полезӣ кишту парвариш карда мешавад.

Тавре  аз мақомоти иҷроияи ҳокимияти давлатии вилояти Суғд ба АМИТ «Ховар» хабар доданд, маҳсулоти истеҳсолгардида барои ташкили хӯроки коргарони ширкат истифода мешавад.

Зимни боздиди раиси вилояти Суғд Раҷаббой Аҳмадзода аз хоҷагии мазкур иттилоъ дода шуд, ки хоҷагии ёрирасони ҶДММ «Фортуна-Ко» бо мақсади саҳмгузорӣ дар таъмини амнияти озуқаворӣ ва дастрасии кормандони ширкат ба маҳсулоти тару тоза соли 2016 таъсис ёфта, масоҳати умумии он 30 гектарро ташкил медиҳад. Бо ташаббуси кормандону роҳбарияти ҶДММ «Фортуна-Ко» дар 20 гектар замини хоҷагии ёрирасон боғи дарахтони мевадиҳандаи зардолу, шафтолу, себ, бодом, олу бунёд ёфта, миқдори умумии дарахтон 6000 бех мебошад. Бо маслиҳати олимону мутахассисон дар хоҷагӣ парвариши ниҳолҳои пайвандӣ низ ба роҳ монда шуда, айни замон 60 ҳазор бех ниҳолҳои пайвандӣ барои ташкили боғоти нав барои истифода омода гардидааст.

Раиси вилоят дар маъракаи ниҳолшинонии хоҷагии ёрирасон ширкат варзида, барои нигоҳубини ниҳолҳо, истифодаи самараноки замин ва васеъ намудани майдони боғоти интенсивӣ ба масъулин дастуру ҳидоятҳо дод.