Саидалӣ Гулов: Сармои рӯзҳои 13 ва 14 март ба гулҳои дарахтони мевадиҳанда таъсири зиёд намерасонад

Март 13, 2021 09:40

ДУШАНБЕ, 13.03.2021 /АМИТ «Ховар»/. Тибқи иттилои Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон, 13-14 март дар ноҳияҳои алоҳидаи ноҳияҳои тобеи ҷумҳурӣ ва вилояти Хатлон бориши пуршиддат пешгӯӣ шуда, дар бештари ноҳияҳои водигӣ-доманакӯҳӣ ва кӯҳии ҷумҳурӣ 14 март борон ба барф мубаддал мегардад. Бо сабаби якбора паст шудани ҳарорати ҳаво дар бештари ноҳияҳои водигӣ-доманакӯҳи ҷумҳурӣ эҳтимоли зиён дидан ва қисман нобудшавии зироати кишоварзӣ, гулҳои ороишӣ, муғҷа  ва гулҳои дарахтони мевадиҳанда пешгӯӣ шуда, чаронидани чорво дар чарогоҳҳои зимистона мушкилӣ пеш меорад.

Вобаста ба таъсири сармои пешгӯишуда хабарнигори АМИТ «Ховар» бо  узви вобастаи Академияи миллии илмҳои Тоҷикистон, профессор Саидалӣ Гулов ҳамсуҳбат гардид.

Мавсуф иброз намуд, ки «паст шудани ҳарорати ҳаво 13 ва 14 март ба зироати кишоварзӣ, гулҳои ороишӣ, муғҷа  ва гулҳои дарахтони мевадиҳанда таъсири зиёд намерасонад. Зеро ин сармо як шабонарӯзро дар бар мегирад. Кишоварзон ва махсусан боғпарварон дар ин як шабонарӯз бояд аз тавсияи олимони кишоварзӣ, яъне дудмонӣ истифода намоянд. Инчунин барои эмин нигоҳ доштани  зироати картошка, ки дар баъзе ноҳияҳои мамлакат дар давраи гулкунӣ ва инкишоф қарор дорад, бояд ба болои онҳо пору ва коҳ пошанд».

Ҳамсуҳбати мо зикр дошт, ки сармои ҳафтаи охири моҳи феврал ба баъзе боғҳои ноҳияҳои шимоли Тоҷикистон каме ҳам бошад, зиён расонид. «Як нуктаро бояд гӯям, ки дарахтони мевадиҳанда вақте гул мекунанд, дар навдаи онҳо муғҷаи захиравӣ низ мавҷуд аст. Баъд аз сипарӣ гардидани сармо он бо таъсири ҳавои муътадил инкишоф меёбад. Дудмонӣ хосияти бартараф кардани ҳарорати паст ва аз сармо нигоҳ доштани дарахтонро дорад. Инчунин дар сурати барфи зиёд боридан боғпарвар бояд навдаҳои дарахтонро аз барф тоза  намояд, то аз шикастан эмин гарданд»,-шарҳ дод Саидалӣ Гулов.

Бояд гуфт, ки баъди сардиҳои охири моҳи феврал дар вилояти Суғд гурӯҳи корӣ таъсис ёфта, дар боғоти навоҳӣ корҳои биокимиёвӣ ва дудмонӣ фавран ба роҳ монда шуданд. Раиси вилояти Суғд Раҷаббой Аҳмадзода ба масъулин ҷиҳати андешидани тадбирҳои  фаврӣ баҳри пешгирӣ аз хисорот супоришҳо дода, таъкид кард, ки дар ин шабу рӯз бояд кишоварзон дар ҳамкорӣ бо олимону коршиносон барои пешгирии таъсири сардӣ дар боғот ва эмин нигоҳ доштани дарахтон тадбирҳои зарурӣ андешанд.

Март 13, 2021 09:40

Хабарҳои дигари ин бахш

Имсол ба Вилояти Мухтори Кӯҳистони Бадахшон беш аз 17 ҳазор сайёҳ ворид гардидааст
35-СОЛАГИИ ИСТИҚЛОЛИ ДАВЛАТӢ. Дар Истаравшан 100 корхонаи саноатӣ фаъолият менамояд
Фаъолияти марказҳои «Тоҷикстандарт» дар вилояти Суғд тақвият меёбад
«Centrum Air» парвозҳои мустақимро дар масири Тошканд-Душанбе-Тошканд оғоз намуд
Дар Душанбе бо ҳайати намояндагони Бонки Осиёии рушд масоили рушди инфрасохтори гумрукӣ баррасӣ шуд
Ҳаҷми истеҳсоли маҳсулоти кишоварзӣ дар Тоҷикистон беш аз 23 миллиард сомониро ташкил дод
Маконҳои таърихӣ, фарҳангӣ ва сайёҳии Тоҷикистонро беш аз 760 ҳазор сайёҳи хориҷӣ тамошо намуданд
Логистика ба бахши ҷудонопазир ва муҳаррики муҳими иқтисод табдил меёбад
Ҷаласаи Кумитаи тадорукот оид ба омодагӣ ва баргузории Форуми байналмилалии сармоягузории «Душанбе Инвест-2025» доир шуд
Дар Форуми иқтисодӣ, сармоягузорӣ ва сайёҳӣ зиёда аз 100 ширкати Тоҷикистон ва Амороти Муттаҳидаи Араб иштирок намуданд
Байни Ҳукумати Ҷумҳурии Тоҷикистон ва Ҳукумати Амороти Муттаҳидаи Араб Созишномаи ҳамкорӣ оид ба алоқаи ҳавоӣ ба имзо расид
Форуми иқтисодӣ, сармоягузорӣ ва сайёҳии Ҷумҳурии Тоҷикистон ва Амороти Муттаҳидаи Араб доир гардид