Ҷаласаи видеоконфронсии Шӯрои байнидавлатӣ оид ба сиёсати зиддиинҳисорӣ байни давлатҳои иштирокчии ИДМ доир шуд

ДУШАНБЕ, 26.04.2021 /АМИТ «Ховар»/. 23 апрел  бо иштироки роҳбарону масъулини мақомоти давлатии зиддиинҳисории кишварҳои ИДМ ҷаласаи 52-юми байнидавлатӣ оид ба сиёсати зиддиинҳисорӣ тариқи видеоконфронс доир гардид.

Тавре аз Хадамоти зиддиинҳисории назди Ҳукумати Ҷумҳурии Тоҷикистон хабар доданд, дар ҷаласа муовини якуми сардори Хадамот Дилшод Музаффарзода иштирок кард.

Дар кори ҷаласа оид ба ҳолат ва роҳҳои рушди рақобатнокӣ дар бозори молӣ, ҳимояи ҳуқуқи истеъмолкунандагон дар шароити маълуми пандемияи КОВИД-19, идоракуниву танзими солими муносибатҳои бозорӣ, мубодилаи таҷрибаи фаъолияти зиддиинҳисорӣ, ошкорсозии созишҳои зиддирақобатӣ  дар шароити  мураккабшавии вазъи бозор ва зимни хариди давлатӣ, оид ба таҷрибаи амалии қатъкунӣ ва пешгирии рақобати бевиҷдонона зимни фурӯши мол бо истифодаи ғайриқонунии моликияти зеҳнӣ, оид ба коркарду таҳияи мавқеи мувофиқшудаи мақомоти зиддиинҳисории кишварҳои узви ИДМ оид ба сиёсати рақобати байналмилалӣ ва муаррифии он дар миқёси байналмилалӣ, оид ба фаъолияти Ситод дар самти таҳқиқоти якҷоя оид ба қонунвайронкунии соҳаи зиддиинҳисории давлатҳои иштирокчӣ, дар бораи таҳияи гузориш оид ба рушди усулҳои нави пардохти ҳаққи хизматрасонӣ, хариду фурӯши мол дар шароити рушди тиҷорати электронӣ – интернетӣ, оид ба маниторинги тағйирёбии нархҳои маҳсулоти мавриди ниёзи аввал дар ҳар кишварҳои узв ва роҳҳои муассири идоракунии буҳронҳои эҳтимолӣ табодули назар анҷом дода шуд.

Зикр шуд,  ки дар шароити маълум ҳифз, рушд ва ҳимояи рақобат асоси равнақи иқтисодиёт ва омили асосии пешгирӣ аз рукуди иқтисодиёт буда, ин принсип то ҳанӯз моҳияти худро гум накардааст.

Бояд гуфт, ки фаъолияти Шӯрои байнидавлатӣ оид ба сиёсати зиддиинҳисорӣ байни давлатҳои иштирокчии Иттиҳоди Давлатҳои Мустақил ба табодули донишу таҷриба дар самти такмили қонунгузории соҳаи зиддиинҳисории кишварҳои ИДМ, (қонунгузории соҳаи зиддиинҳисорӣ дар соҳаи ҳимояи рақобат),  ҳимояи ҳуқуқи истеъмолкунандагон, инҳисороти табиӣ, реклама, омӯзиши таҷрибаи ҷаҳонии қонунгузории соҳаи зиддиинҳисорӣ ва татбиқи он дар миқёси кишварҳои узви ИДМ, таҳияву пешниҳоди модели рушди иқтисодӣ ва мушкилоти онҳо дар соҳаи сиёсати рақобатнокӣ равона гардидааст.