Дар ҳудуди ноҳияи Ишкошим миқдори махсусан калони маводи мухаддир мусодира гардид

Апрель 6, 2021 09:37

ДУШАНБЕ, 06.04.2021 /АМИТ  «Ховар»/. Кормандони Раёсати Агентии назорати маводи нашъаовари назди Президенти Ҷумҳурии Тоҷикистон дар Вилояти Мухтори Кӯҳистони Бадахшон ҳангоми гузаронидани чорабиниҳои фаврӣ-ҷустуҷӯӣ дар ҳудуди ноҳияи Ишкошим миқдори махсусан калони маводи мухаддир мусодира намуданд. Дар ин бора аз Агентии назорати  маводи нашъаовар ба АМИТ «Ховар» хабар доданд.

7 марти соли равон аз ҷониби кормандони Раёсати мазкур  ҳангоми гузаронидани чорабиниҳои фаврӣ-ҷустуҷӯӣ дар ҳудуди ноҳияи Ишкошим шаҳрванд Мирзоев Маҳмуд Шодмонбекович, соли таваллудаш 1982, зода ва истиқоматкунандаи деҳаи Дашти Ҷамоати деҳоти А.Замирови ноҳияи Ишкошим, бо гумони даст доштан дар қочоқи маводи нашъадор дастгир гардид.  Ҳангоми азназаргузаронии шахсӣ аз борхалтаи полиэтилении рангаш сафед, ки ба мавсуф тааллуқ дошт, 49 адад бастаҳои селофании скочпечи дар дохилашон маводи бӯи махсусдошта дарёфт карда шуд. Ташхис муайян намуд, ки маводи мусодирашуда навъи нашъаовари ҳашиш буда, вазни холиси он 47 кг 305 граммро ташкил дод.

Зимни тафтиш муайян карда шуд, ки Мирзоев Маҳмуд бо маслиҳати пешакӣ бо шаҳрванди Ҷумҳурии Исломии Афғонистон- шахси ба тафтиш номаълум бо номи Файз ва тахаллуси «Муаллим» миқдори махсусан калони воситаҳои нашъадорро ғайриқонунӣ бо мақсади ба соҳибияти каси дигар додан ба даст овардааст.

Амали ношоистаи Мирзоев Маҳмуд Шодмонбекович аз чашми кормандони Агентӣ дур намонда, ӯ бо ҷурми қочоқ ва муомилоти маводи мухаддир ба миқдори махсусан калон дастгир карда шуд. Дар айни ҳол нисбат ба дастгиршуда  бо моддаҳои 200, қисми 4, банди «д» ва 289, қисми 3-и Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шудааст.

Вобаста ба ин нисбат ба шаҳрвандони ноҳияи Ишкошим Уталбеков Аъзам Ақризобекович, истиқоматкунандаи Ҷамоати деҳоти А.Замиров, деҳаи Дашт ва Аноятбеков Суҳроб Рустамбекович, истиқоматкунандаи Ҷамоати деҳоти А.Замиров, деҳаи Андароб бо сабаби огоҳӣ доштан аз кирдори шаҳрванд Мирзоев Маҳмуд оид ба хариду фурӯши маводи нашъадор ва хабар надодан ба мақомоти ҳифзи ҳуқуқ мутобиқи Кодекси ҷиноятии Ҷумҳурии Тоҷикистон бо моддаи 347 қисми 1, яъне хабар надодан дар бораи ҷиноят ва пинҳон доштани ҷинояти номбурда парвандаи ҷиноятӣ оғоз карда шуд. Нафарони зикршуда ба ҳабс гирифта шуда, корҳои  тафтишотии пешакӣ идома доранд.

 АКС аз бойгонӣ

Апрель 6, 2021 09:37

Хабарҳои дигари ин бахш

Рамазон Раҳимзода ва Валентина Казакова ҳамкорӣ дар самти ҳифзи ҳуқуқи муҳоҷирони меҳнатиро баррасӣ намуданд
ДАР СААД МЕХОҲАНД ВОҲИДИ ТАЪЙИНОТИ МАХСУС ТАЪСИС ДИҲАНД. Намояндаи Вазорати мудофиаи Тоҷикистон дар мулоқоти роҳбарони хадамоти тиббии вазоратҳои мудофиаи кишварҳои узви СААД дар Москва маърӯза намуд
Шаби гузашта таркиши шадид Кобулро такон дод
Агентии назорати маводи нашъаовар барои паст кардани сатҳи нашъамандӣ бо САҲА нақшаи муштарак ба имзо расонид
Генерал-полковник Рамазон Раҳимзода: Бо муомилоти ғайриқонунии сангҳои қиматбаҳо ва шикори ҳайвоноти нодир мубориза баред!
Рамазон Раҳимзода дар ҷаласаи ҷамъбастии фаъолияти семоҳаи Раёсати Вазорати корҳои дохилӣ дар Вилояти Мухтори Кӯҳистони Бадахшон иштирок намуд
20 РӮЗИ ДАЪВАТИ БАҲОРӢ: Дар Тоҷикистон иҷрои нақша ба 80,5 фоиз баробар гардид
Дар Тоҷикистон машқҳои муштараки амалиётӣ-стратегӣ ва ҷамъомади мудофиаи ҳудудӣ оғоз гардиданд
Ҷаласаи Шӯрои доимии СААД таҳти раёсати Намояндаи доимии Тоҷикистон баргузор шуд
Нуҳ нафар дар ҳодисаҳои зидди амниятӣ дар Афғонистон кушта шуданд
Ду сокини шаҳри Норак бо гумони тайёр кардани қоғазҳои қиматноки қалбакӣ ва ба муомилот баровардани он боздошт шуданд
Вазири корҳои дохилӣ аз ҷузъу томҳои Раёсати ВКД дар ВМКБ дидан намуд

Маводҳои таҳлилӣ