ДАРАХТ БИНШОН! Дар шаҳри Хуҷанд дар доираи корҳои ободонӣ 140 бех ниҳоли нодири магнолия шинонида шуд

Апрель 3, 2021 09:55

ХУҶАНД, 03.04.2021. /АМИТ «Ховар»/. Бо иштироки раиси вилояти Суғд Раҷаббой Аҳмадзода ва шаҳрдори Хуҷанд Фирдавс Шарифзода, инчунин соҳибкорону сокинони маҳаллаи Сирдарё дар хиёбони Раҳим Ҷалили шаҳр ҳашари ниҳолшинонӣ доир гардид. Зимни он дар шоҳроҳи хиёбони мазкур беш аз 140 бех ниҳолҳои 6-метраи нодири навъи магнолия шинонида шуданд.

Тавре хабарнигори минтақавии АМИТ «Ховар» бо истинод ба маълумоти масъулини хадамоти матбуоти раиси шаҳри Хуҷанд иттилоъ медиҳад, дар вилояти Суғд ба истиқболи 30-солагии Истиқлоли давлатии Ҷумҳурии Тоҷикистон 1300 рӯзи меҳнати зарбдор эълон гардидааст, ки дар доираи он корҳои ободонӣ, маъракаи ниҳолшинонӣ ва  сарсабзу хуррам гардонидани маҳалҳо бомаром идома дорад. Сокинони касбу кори гуногун дар корҳои бунёдкорӣ якдилона иштирок доранд. Хосатан, вусъати ин маъракаи муҳим дар маркази вилоят — шаҳри Хуҷанд бештар ба назар мерасад.

Дар ояндаи наздик хиёбони Раҳим Ҷалили маркази вилоят бо назардошти талаботи замони муосир ба яке аз гулгаштҳои намунавӣ дар шаҳр мубаддал гардида, марҳила ба марҳила ба ҳусни тамоми хиёбонҳои шаҳр бо чунин усул шукӯҳ бахшида мешавад.


Ба таъкиди мутахассисони соҳа, дарахти магнолия ба гурӯҳи дарахтони баланди ороишӣ мансуб буда, он аз худ бӯйи муаттари лимӯ хориҷ менамояд. Магнолия зиёда аз 70 намуд дошта, бо тоҷи васеи пирамида метавонад аз 8 то 20 метр қад кашад. Вобаста аз гуногунӣ гулҳои ин дарахт метавонанд сафед, гулобӣ, арғувон, сурх шаванд ва он ба фасли зимистон тобовар мебошад.

Хотиррасон бояд кард, ки чанде пеш дар доираи маъракаи ниҳолшинонӣ ва вусъат бахшидани корҳои ободонӣ дар шоҳроҳи Хуҷанд — Ғафуров 60 бех, дар хиёбони Исмоили Сомонии шаҳр 20 бех ва дар майдони Парчами миллии Ҷумҳурии Тоҷикистон дар назди Мақомоти иҷроияи ҳокимияти давлатии вилоят даҳ бех дарахтони нодири шашметраи магнолия шинонида шуданд.

Маъракаи сабзазоркуниву ободонӣ дар дигар шаҳру ноҳияҳои вилояти Суғд  низ густариш ёфта, дар кӯчаву хиёбонҳо, мавзеъҳои истироҳативу сайёҳӣ ва назди ташкилоту идораҳо шинонидани гулу ниҳолҳои ороишӣ бомаром ҷараён доранд. 

АКСҲО аз хадамоти матбуоти Раиси шаҳри Хуҷанд

Апрель 3, 2021 09:55

Хабарҳои дигари ин бахш

ДАРАХТ БИНШОН! Дар боғи навбунёди Шуғнон 15 ҳазор бех ниҳоли дарахтони мевадиҳанда шинонида шуд
ДАРАХТ БИНШОН! Дар боғи навбунёди ноҳияи Мурғоб беш аз 10 ҳазор бех ниҳол шинонида шуд
ДАРАХТ БИНШОН! Дар ноҳияи Шуғнон боғи намунавӣ бунёд гардид
Дар шафати кӯли Ҳафткӯл-Ҳазорчашма 3900 бех ниҳолҳои мевадиҳанда шинонида шуд
БАРНОМАИ «КИШВАРИ САБЗ». Дар ноҳияи Айнӣ дар 0,80 гектар ниҳолхона ташкил карда шуд
«КАМАРБАНДИ САБЗ». Дар шафати роҳҳои автомобилгард беш аз 180 ҳазор бех ниҳол шинонида шуд
Дар ноҳияи Рӯшон дар 1 гектар боғи мевадиҳанда бунёд гардид
КИШВАРИ САБЗ. Дар шоҳроҳи Душанбе — Ваҳдат маъракаи муштараки ниҳолшинонӣ доир шуд
ДАРАХТ БИНШОН! Дар ноҳияи Ванҷ мавсими ниҳолшинонӣ оғоз ёфт
ДАРАХТ БИНШОН! Дар Истаравшан беш аз 18 ҳазор бех ниҳол шинонида шуд
ДАРАХТ БИНШОН! Дар шаҳри Хуҷанд ниҳолҳои ҳамешасабзи сарви аризонӣ шинонида шуданд
24 март — Рӯзи гул ва ниҳолшинонӣ. То соли 2040 дар Тоҷикистон беш аз 2 миллиард бех ниҳол шинонида мешавад