Сомон Маҳмадбеков дар Чемпионати Осиё-Океания соҳиби медали нуқра шуд

ДУШАНБЕ, 07.04.2021 /АМИТ «Ховар»/. Имрӯз, дар рӯзи дуюми Чемпионати Осиё-Океания, ки дар шаҳри Бишкеки Ҷумҳурии Қирғизистон ҷараён дорад, паҳлавони маъруфи тоҷик Сомон Маҳмадбеков дар вазни 73кг бар се ҳарифаш  ғолиб омада,  дар финал  аз қаҳрамони Doha Masters 2021, намояндаи кишвари Кореяи Ҷанубӣ – Ан Чангрим шикаст хӯрда, сазовори медали нуқра гардид.  Дар ин  бора шореҳи  варзиши АМИТ «Ховар» Меҳрони Қурбон бо истинод ба Федератсияи дзюдои Тоҷикистон хабар медиҳад.

Нахустин шуда, варзишгари шинохтаи тоҷик Сомон Маҳмадбеков дар вазни -73кг рӯи татамӣ баромад. Дар даври аввал ӯ бо намояндаи Яман — Айяш Аҳмад рақобат намуда, пирӯз шуд ва ба даври дуюм роҳ ёфт. Дар марҳилаи мазкур Сомон бар Муҳаммадӣ Муҳаммад аз Эрон ғолиб омада, ба марҳилаи ½-ниҳоӣ роҳ ёфт. Дар нимфинал Сомон Маҳмадбеков бо барандаи медали тиллои Tunis Grand Prix 2018 — Жансай Смагулови қазоқ қувва  санҷид. Дар ин рақобат паҳлавони мо аз худ маҳорати баланд нишон дода, рақибро мағлуб карда, ба финал роҳ ёфт.   Сомон Маҳмадбеков  дар финал бо қаҳрамони Doha Masters 2021, намояндаи кишвари Кореяи Ҷанубӣ – Ан Чангрим  сабқат намуда, шикаст хӯрд ва мақоми дуюмро соҳиб шуд.

Ҳамчунин   дар ин рӯз рақобатҳои паҳлавонони дигари  тоҷик, Ҳақназар Назаров ва Акмал Муродов, ҳарду дар вазни  -81 кг доир шуданд. Ҳақназар Назаров, ки дар даври аввал озод буд, дар даври дуюм бо ҳарифаш аз Кореяи Ҷанубӣ — Мун Ҷин Ли қувва санҷид. Дар ин майдондорӣ варзишгари  мо бо усули «ваза-ари» шикаст хӯрда, аз идомаи сабқатҳо маҳрум шуд. Варзишгари  дигари ин вазн Акмал Муродов рақобатро аз марҳилаи дуюм бар муқобили Халил Ребаҳии қатарӣ оғоз кард. Дар ин дидор Акмал Муродов комёб шуда, ба даври навбатӣ роҳ пайдо кард. Дар даври навбатӣ Акмал Муродов аз паҳлавони  эронитабори Муғулистон — Саид Муллаӣ  мағлуб гардид ва аз идомаи рақобатҳои  Чемпионати Осиё-Океания маҳрум шуд.