Дар маҳаллаи Мевагули Хуҷанд мағозаи «Олами паранда ва ҳайвонот» ба фаъолият оғоз намуд

ДУШАНБЕ, 16.05.2021 /АМИТ «Ховар»/. Дар маҳаллаи Мевагули шаҳри Хуҷанд мағозаи «Олами паранда ва ҳайвонот» кушода шуд,   ки дар маросими ифтитоҳи он роҳбарият ва кормандони мақомоти ҳифзи муҳити зисти вилоят, Кумитаи бехатарии озуқавории вилоят, табиатдӯстон ва сокинони маҳалла иштирок намуданд.

Кумитаи ҳифзи муҳити зисти назди Ҳукумати ҷумҳурӣ иттилоъ медиҳад, ки мағозаи «Олами паранда ва ҳайвонот» бо мақсади тарғиби зебоипарастӣ ва табиатдӯстӣ, баланд бардоштани маърифати экологии аҳолӣ ташкил гардида, беш аз 25 намуди паранда, зиёда аз 50 намуди моҳичаҳо, 10 намуди гурба, якчанд намуди хазандаю ҳашароти баҳрӣ бо шароити зарурии нигоҳдорӣ барои тамошо ва фурӯш гузошта шудаанд.

Дар мағоза ҳамчунин маводи хӯрокаи парандаю ҳайвонот, ки истеҳсоли корхонаҳои ватанӣ ва хориҷианд, ба фурӯш гузошта шуда, барои нигоҳдории паранда ва ҳайвонот қафасҳои гуногун ва аквариумҳои муосир пешниҳоди харидорон гардидаанд. Дар ин мағоза тамоми таҷҳизоти марбут ба нигоҳдорӣ ва истифодаи олами ҳайвонот мавҷуд мебошад.

Дар маркази вилояти Суғд ба ғайр аз бозори паранда ин сеюмин мағозаи «Олами паранда ва ҳайвонот» аст, ки ҷиҳати рушди тарбияи экологии насли наврас, ташаккул додани дӯстдорӣ ба табиат ва муносибати эҳтиёткорона нисбат ба олами ҳайвонот дар ниҳоди онҳо мусоидат менамояд.

               АКСҲО аз Кумитаи ҳифзи муҳити зисти назди Ҳукумати  ҶТ