Дар Кумитаи давлатии сармоягузорӣ ва идораи амволи давлатӣ бахшида ба Рӯзи Ваҳдати миллӣ ҳамоиш доир гардид

ДУШАНБЕ, 22.06.2021/АМИТ «Ховар»/. «Ваҳдати миллӣ омили рушди ҷомеа» — таҳти чунин унвон дар Кумитаи давлатии  сармоягузорӣ ва идораи амволи давлатии Ҷумҳурии Тоҷикистон ба ифтихори 24 –умин солгарди Рӯзи Ваҳдати миллӣ ҳамоиш доир гардид. Муовини раиси Кумитаи давлатии сармоягузорӣ ва идораи  амволи давлатӣ Саид Зуҳурзода зикр намуд, ки Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пайваста талқин месозанд, ки бунёди давлати демократӣ, ҳуқуқбунёд, дунявӣ ва ташаккули ҷомеаи шаҳрвандӣ дар Тоҷикистон, ки мо дар роҳи эъмори он бо қадамҳои устувор пеш рафта истодаем, далели равшану возеҳи тантанаи сулҳу оромӣ, ваҳдати миллӣ ва ҳамдигарфаҳмии халқамон мебошад.

-Бо  саъю талоши Пешвои миллат муҳтарам Эмомалӣ Раҳмон Созишномаи истиқрори сулҳ ва ризоияти миллӣ дар Тоҷикистон ба имзо расид ва барои тоҷикон иттиҳод, ягонагӣ, якпорчагӣ, ҳамдигарфаҳмӣ, амнияту осоиштагӣ, ҳамзистии осоишта, раванди созандагиро дар ҷомеа фароҳам овард, -афзуд номбурда.

Дар ҳамоиш мутахассиси пешбари Маркази тадқиқоти стратегии назди Президенти Ҷумҳурии Тоҷикистон Алиназар Ашуров  вобаста ба ҳифзи ваҳдати миллӣ  изҳор дошт, ки воқеияти сиёсӣ ва ҳақиқати рӯзгор бозгӯйи он аст, ки ба василаи ваҳдати миллӣ давлатҳо муҳимтарину бузургтарин ормону ҳадафҳои миллии худро амалӣ гардонидаанд. Чунин воқеиятро таҷриба ва таърихи сиёсии  Тоҷикистон ба таври дақиқ собит намуд, ки ваҳдати миллӣ омили муҳимтарини пешрафти шахс, ҷомеа ва давлат аст.

     Аксҳо аз Кумитаи давлатии сармоягузорӣ ва идораи амволи давлатӣ