Дар Ҳисор Дастгоҳи радиолокатсионӣ-радарии муосир бо тамғаи ДМРЛ-С-5 доплерӣ ба истифода дода шуд

Август 3, 2021 13:48

ДУШАНБЕ, 03.08.2021 /АМИТ «Ховар»/. Бахшида ба 30-солагии Истиқлоли Ҷумҳурии Тоҷикистон имрӯз дар ҳудуди яке аз ҷамоатҳои шаҳри Ҳисор маросими ифтитоҳи Дастгоҳи радиолокатсионӣ-радарии муосир бо тамғаи ДМРЛ-С-5 доплерӣ барои Хадамоти зиддижолаи Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ва таъмири иншооти ёрирасон баргузор гардид.

Дар маросими мазкур Сарвазири Ҷумҳурии Тоҷикистон Қоҳир Расулзода, Раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон Рустам Назарзода, раисони якчанд шаҳру ноҳияҳо ва намояндагони созмонҳои байналмилалӣ иштирок намуданд.

Сарвазири мамлакат Қоҳир Расулзода иброз намуд, ки «муайян ва пешгирӣ кардани ҳодисаҳои зиддижола имрӯз яке аз мушкилиҳои  ҷиддӣ ба ҳисоб меравад. Мо ҳамасола шоҳиди он ҳастем, ки бар асари офатҳои табиӣ ҳазорҳо гектар замин шуста мешаванд. Коре, ки имрӯз ба анҷом расонида шуд, на танҳо барои Тоҷикистон, балки давлатҳои ҳамсоя низ хеле муҳим ва зарурӣ мебошад».

-Ҷумҳурии Тоҷикистон дар минтақаи хатарнок қарор дорад ва ҳамарӯза ягон ҳодисаи фавқулода ба қайд гирифта мешавад. Аз ин рӯ пешгӯӣ, пешгирӣ ва муайян кардани ҳолатҳои фавқулода дар минтақа бисёр зарур мебошад,- афзуд Қ. Расулзода.

Дастгоҳи радиолокатсионӣ дар Низоми пешгӯӣ ва пешгирии омилҳои хавфноки метеорологӣ иншооти муҳим ба ҳисоб рафта, ба ҳифзи киштзор, боғу ток ва дигар зироат аз бориши жола равона гардидааст.

 
Таҷҳизоти мазкур дорои имконияти васеъ буда, назорати масофаи заруриро дар масоҳати 250 км таъмин ва бо реҷаи фаврӣ маълумотро қабул ва ирсол мекунад. Дар баробари ин, ҳаҷми ҷамъшавии барф, яхпораҳо, инчунин ҳаҷм, шакл, намуди абр, пайдарпайӣ ва навъи бориш, мавҷудияти жола ва ҳаҷми гуногунии онро муайян менамояд. Он метавонад шиддати боришро муайян кунад, ки дар асоси он  мутахассисони соҳавӣ имкон доранд мавзеъҳои баамалойии ҷараёнҳои сел, ярч, жола ва шамолҳои сахтро пешгӯӣ намоянд.

Ба гуфтаи сухангӯи Кумитаи ҳолатҳои фавқулода ва мудофиаи граждании мамлакат Умеда Юсуфӣ, аз фаъолияти Дастгоҳи радиолокатсионии ҳозиразамони Хадамоти зиддижола  мутахассисони Вазорати кишоварзии мамлакат, Агентии обуҳавошиносии Кумитаи ҳифзи муҳити зист, Агентии беҳдошти замин ва обёрӣ, Корхонаи воҳиди давлатии “Тоҷикаэронавигатсия” ва дигар мақомоту идораҳои дахлдору созмонҳои байналмилалӣ  метавонанд дар фаъолияти худ истифода намоянд.

Мувофиқи корҳои мавсимӣ, соли равон майдони 609 ҳазор гектар заминҳои кишоварзии хоҷагиҳои  водии Ҳисор ва водии Вахш аз офатҳои табиӣ- бориши жола ҳифз карда мешавад.

Ёдовар мешавем, ки дастгоҳи мазкур дар доираи амалишавии Лоиҳаи миллии идоракунии хавфҳои офатҳои табиӣ, ки аз ҷониби Бонки Осиёии Рушд маблағгузорӣ мешавад, харидорӣ шудааст.

 

АКСҲО аз АМИТ «Ховар»

Август 3, 2021 13:48

Хабарҳои дигари ин бахш

Сарвазири Тоҷикистон Қоҳир Расулзода аз шаҳри Ҳисор боздид намуд
Маркази миллии тестӣ: Имсол шумораи ихтисосҳо дар заминаи таҳсилоти умумии синфи 11 даҳ адад зиёд шуд
ҶАМЪБАСТИ НИШАСТҲОИ МАТБУОТӢ: 4 август Вазорати корҳои дохилӣ нишасти матбуотӣ баргузор менамояд
Дар Академияи идоракунии давлатӣ маркази омӯзишӣ ва магистратураи «Мактаби давлатдории Эмомалӣ Раҳмон» ифтитоҳ ёфт
ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Ба шарафи ҷашни бузурги миллӣ дар Лахш 221 иншооти гуногун бунёд мешаванд
Аз 2 то 7 август Мусобиқаи байналмилалӣ оид ба теннис барои дарёфти Ҷоми Президенти Ҷумҳурии Тоҷикистон ҷараён мегирад
3 август Маркази миллии тестӣ нишасти матбуотӣ баргузор менамояд
Дар доираи саноатикунонӣ дар шаҳри Ҳисор 74 корхонаи саноатӣ фаъол гардиданд
ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Дар Шаҳринав 377 иншоот бо харҷи беш аз 45 млн сомонӣ ба истифода дода шуданд
Дар Душанбе корҳои ободонию созандагӣ ба истиқболи 30-солагии Истиқлоли давлатӣ 93,4 фоиз иҷро гардидаанд
«ЗИ ҶӮЕ, КИ ХУРДӢ АЗ ОН ОБИ ПОК…». Экожурналистҳо соҳили дарёи Варзобро аз партовҳо тоза намуданд
Натиҷаҳои пешакии барӯйхатгирии аҳолӣ ва фонди манзил дар шашмоҳаи дуюми соли равон ҷамъбаст мешаванд

Маводҳои таҳлилӣ