Дар Бонки миллӣ роҳҳои татбиқи Лоиҳаи «Асосҳои рақамикунонии Тоҷикистон» баррасӣ шуданд

ДУШАНБЕ, 28.10.2021 /АМИТ «Ховар»/. Ҳоло дар Тоҷикистон бо иштироки Бонки ҷаҳонӣ 23 лоиҳаи сармоягузории давлатӣ татбиқ мегарданд, ки барои беҳтар намудани фаъолияти соҳаи нақлиёт, тиҷорат, сармоягузорӣ, маориф, кишоварзӣ, тандурустӣ, обтаъминкунӣ, энергетика, ҳифзи муҳити зист, ҳолатҳои фавқулода ва сайёҳӣ равона гардидаанд,-чунин иброз дошт муовини Раиси Бонки миллии Тоҷикистон Моҳбону Накҳатзода  зимни мулоқот бо ҳайати Бонки ҷаҳонӣ таҳти роҳбарии мутахассиси пешбар оид ба масъалаҳои рушди рақамӣ ва роҳбари лоиҳаи «Асосҳои рақамикунонии Тоҷикистон» Хуан Навас-Сабатер, ки бо сафари корӣ дар Тоҷикистон қарор дорад.

Тавре ба АМИТ «Ховар» аз Бонки миллии Тоҷикистон хабар доданд,  Моҳбону Накҳатзода аз ҳамкории самарабахши БМТ ва Бонки ҷаҳонӣ дар самти татбиқи лоиҳаҳои гуногун изҳори қаноатмандӣ карда, меҳмононро бо вазъи ҷории низоми бонкии Ҷумҳурии Тоҷикистон шинос намуд. Дар мулоқот роҳҳои татбиқи босамари лоиҳаи  «Асосҳои рақамикунонии Тоҷикистон», ки яке аз ҳадафҳои он рақамикунонии низоми бонкӣ мебошад, баррасӣ гардид.

Хуан Навас-Сабатер зикр намуд, ки ҳадафи сафари ҳайати Бонки ҷаҳонӣ ба Тоҷикистон мувофиқа ва коркарди усулҳои самараноки татбиқи «Асосҳои рақамикунонии Тоҷикистон» мебошад. Амалисозии лоиҳаи мазкур ба рушди сиёсати рақамӣ ва устувории низоми бонкии Ҷумҳурии Тоҷикистон мусоидат менамояд. Лоиҳаи «Асосҳои рақамикунонии Тоҷикистон» дар сатҳи давлатӣ амалӣ гардида, тамоми бахшҳои иқтисодиву иҷтимоиро дар бар мегирад ва ҳадафаш баланд бардоштани самаранокии фаъолият мебошад. Низоми бонкӣ низ ҳамчун яке аз бахшҳои муҳими сохтори давлатӣ ба раванди татбиқи лоиҳаи «Асосҳои рақамикунонии Тоҷикистон» ҷалб гардида, дар марҳилаи кунунӣ татбиқи технологияҳои муосири рақамӣ ҳамчун ҷанбаи асосии таъмини самаранокии лоиҳа саҳм мегузорад.

Дар мулоқот инчунин масъалаҳои густариши равобити дуҷониба дар бахши технологияҳои нав ва дурнамои ҳамкорӣ матраҳ гардиданд.

Акс аз БМТ