Масъалаи таъсиси корхонаҳои муштарак дар минтақаҳои озоди иқтисодии Тоҷикистон баррасӣ шуд

ДУШАНБЕ, 21.10.2021 /АМИТ «Ховар»/. Дар доираи баргузории ҷаласаи якуми Комиссияи муштараки Тоҷикистон ва Маҷористон оид ба ҳамкории иқтисодӣ, ки имрӯз дар Душанбе доир мешавад, Вазири рушди иқтисод ва савдои Ҷумҳурии Тоҷикистон Завқӣ Завқизода бо Вазири корҳои хориҷӣ ва тиҷорати берунаи Ҷумҳурии Маҷористон Петер Сийяарто 20 октябр мулоқот анҷом дод, иттилоъ доданд ба АМИТ «Ховар» аз Вазорати рушди иқтисод ва савдои Ҷумҳурии Тоҷикистон.

Завқӣ Завқизода зикр намуд, ки Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати тавсеа ва рушди ҳамкорӣ бо Ҷумҳурии Маҷористон таваҷҷуҳи хосса зоҳир менамоянд.

Дар мулоқот мусоҳибон масъалаҳои баимзорасонии Протоколи ҷаласаи якуми Комиссияи муштараки Тоҷикистон ва Маҷористон оид ба ҳамкории иқтисодӣ, таъсиси корхонаҳои муштарак дар минтақаҳои озоди иқтисодӣ бо мақсади истеҳсоли маҳсулоти нассоҷӣ, коркарди маҳсулоти кишоварзӣ ва дорувориро мавриди баррасӣ қарор дода, оид ба ҳамкории муосир ва имконоти рушди минбаъда мубодилаи афкор намуданд.

Дар анҷоми вохӯрӣ ҷонибҳо омодагии худро барои густариши ҳамкории судманд ва истифодаи самараноки имконияти мавҷуда изҳор намуданд.

 Акс аз Вазорати рушди иқтисод ва савдои ҶТ