Бонки ҷаҳонӣ барои татбиқи лоиҳаи нав дар соҳаи маорифи Тоҷикистон маблағ ҷудо менамояд

Ноябрь 24, 2021 11:05

ДУШАНБЕ, 24.11.2021. /АМИТ «Ховар»/. Бонки ҷаҳонӣ тасмим гирифтааст, ки барои татбиқи як лоиҳаи нав дар соҳаи маорифи мамлакат маблағ ҷудо намояд, ки он ба беҳтар гардидани шароит дар муассисаҳои таҳсилоти ибтидоию миёнаи умумӣ ва рушди соҳаи маорифи Тоҷикистон муосидат мекунад. Ин нукта дирӯз зимни вохӯрии Вазири маориф ва илми Ҷумҳурии Тоҷикистон Муҳаммадюсуф Имомзода бо директори минтақавии Бонки ҷаҳонӣ оид ба рушди инсон дар Аврупо ва Осиёи Марказӣ Фадиа Саада, намояндаи доимии Бонки ҷаҳонӣ дар Тоҷикистон Озан Севимли баён гардид, иттилоъ доданд аз маркази матбуоти Вазорати маориф ва илми Ҷумҳурии Тоҷикистон ба АМИТ «Ховар».

Зикр шуд, ки лоиҳаи таҳияшаванда фарогир буда, ба сохтмони муассисаҳои таълимӣ бо назардошти тамоми инфрасохтори зарурӣ, аз ҷумла синфхонаҳои таълимию лабораторӣ, таъминот бо обу санитария ва амсоли инҳо нигаронида шудааст. Ҳамзамон лоиҳаи мазкур дар доираи Стратегияи миллии рушди маорифи Ҷумҳурии Тоҷикистон барои давраи то соли 2030 таҳия шуда, ҷиҳати рушди соҳа мусоидат менамояд.

Зимни суҳбат Вазири маориф ва илм аз ҳамкории судманди ҷойдошта ёдовар шуда, гуфт, ки Бонки ҷаҳонӣ давоми 20 сол аст бо Вазорати маориф ва илм ҳамкорӣ ба роҳ мондааст ва ҷиҳати рушди соҳаи маориф якчанд корҳои судманд анҷом додааст.

Лоиҳаҳои гузариши муассисаҳои таълимӣ ба маблағгузории меъёрӣ, Низоми иттилоотии идоракунии соҳаи маориф, таъсиси Маркази миллии тестӣ ва таҳияи низоми ягонаи имтиҳонсупорӣ тавассути ин марказ, таълими муносибати босалоҳият, коркарди лоиҳаи низоми баҳогузории синфҳои ибтидоӣ, татбиқи лоиҳаи «Рушди таҳсилоти олӣ», аз курсҳои омӯзишӣ ва бозомӯзӣ гузаронидани беш аз 6 ҳазор омӯзгор, нашри беш аз 9 миллион китоби дарсӣ ва таъмиру сохтмони беш аз 300 муассисаи таълимӣ аз ҷумлаи онҳост.

Таъкид гардид, ки бо вуҷуди корҳои анҷомёбанда ҳанӯз ҳам чанд мушкилӣ ҷой доранд, ки дар ҳамбастагӣ бояд ҷиҳати рафъи онҳо мусоидат намуд ва яке аз ин мушкилот бо назардошти афзоиши босуръати аҳолӣ норасоии ҷойи нишаст дар мактабҳо ва зарурати сохтмони муассисаҳои таълимӣ мебошад.

Тавре маълумоти оморӣ нишон медиҳад, агар дар як сол 100-120 ҳазор нафар муассисаҳои таълимиро хатм кунанд, пас то 250 ҳазор нафар ба муассисаҳои таълимӣ дохил мешаванд. Инчунин муассисаҳои таълимие вуҷуд доранд, ки ҳанӯз солҳои 20-30-и асри гузашта сохта шуда, имрӯз дар ҳолати садамавӣ қарор доранд ё маҳаллаҳои зиёди навбунёде ҳастанд, ки ба сохтмони мактабҳо ниёз доранд. Ҷиҳати ҳалли ин мушкилот Ҳукумати Ҷумҳурии Тоҷикистон тамоми тадбирҳоро андешида истода, ба бахши хусусӣ низ тамоми имтиёзҳо дода шудааст ва ҳамкорию дастгирии шарикони рушд низ назаррас аст.

Намояндаи доимии Бонки ҷаҳонӣ дар Тоҷикистон Озан Севимли зикр кард, ки Бонки ҷаҳонӣ ҷиҳати рушди соҳаи маориф тамоми шароитро муҳайё месозад ва ин гуна талош аз ҷониби Вазорати маориф ва илми Ҷумҳурии Тоҷикистон низ ба мушоҳида мерасад.

Ҷонибҳо дурнамои ҳамкориро баррасӣ ва барои татбиқи муваффақонаи лоиҳаи нав омодагии хешро иброз доштанд.

Ёдовар мешавем, ки тибқи омор, то моҳи сентябри соли равон дар мамлакат 3911  муассисаи  таҳсилоти миёнаи умумӣ бо фарогирии   2 108 942 хонанда фаъолият доранд.

АКС: маркази матбуоти Вазорати маориф ва илми Ҷумҳурии Тоҷикистон

Ноябрь 24, 2021 11:05

Хабарҳои дигари ин бахш

Имрӯз даври ниҳоии Озмуни ҷумҳуриявии «Илм–фурӯғи маърифат» оғоз мегардад
Рӯзи дарҳои кушоди Академияи хурди илмҳои Тоҷикистон баргузор шуд
КИТОБ-МУАРРИФИ ДАСТОВАРДҲОИ АДИБОН. Бардошт аз баргузории Намоишгоҳи байналмилалии «Китоби Душанбе»
Байни «Тоҷикфилм» ва шаш киностудияи кишварҳои ИДМ ва хориҷи наздик Ёддошти тафоҳум ба имзо расид
Намоишгоҳи байналмилалии «Китоби Душанбе» оғоз гардид
Шоҳҷоизаи Синамоҷашнвораи дуюми байналмилалии «Тоҷи Сомон»-ро коргардони тоҷик Муҳиддин Музаффар соҳиб шуд
«КИТОБИ ДУШАНБЕ». Пагоҳ дар Душанбе намоиши сенздаҳуми байналмилалӣ оғоз мегардад
Эмомалӣ Раҳмон: «Таҷлили Меҳргон далели эҳтиром ба фарҳанги қадима ва суннатҳои созандаи миллати тоҷик аст»
Имрӯз дар Фестивали «Оши палов» намудҳои гуногуни ин таоми миллӣ омода карда шуданд
СЕБҲОИ ТОҶИКИСТОН БО ТАМЪИ ЛАЗИЗАШОН МАШҲУРАНД. Дар Душанбе Иди себ ва ангур таҷлил гардид
Дар Душанбе Иди Меҳргон ба таври тантанавӣ таҷлил гардид
Имрӯз ҷашни Меҳргон бо баргузории Фестивал-намоиши маҳсулот ва техникаи кишоварзӣ оғоз мегардад