ИМРӮЗ — РӮЗИ АВВАЛИ ЗИМИСТОН. Сокинони Тоҷикистонро чӣ гуна ҳаво интизор аст?
ДУШАНБЕ, 01.12.2021 /АМИТ «Ховар»/. Имрӯз, 1 декабр рӯзи нахустини фасли зимистон аст. Барои фаҳмидани он ки сокинони Тоҷикистонро зимистони дар пешистода чӣ гуна ҳаво интизор аст, хабарнигори АМИТ «Ховар» Марзия САИДЗОДА бо муовини директори Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон Ҷамила БАЙДУЛЛОЕВА ҳамсуҳбат гардид.
«Тибқи таҳлилҳои мутахассисони Агентии обуҳавошиносии Тоҷикистон, зимистони солҳои 2021-2022 дар Тоҷикистон ва дар маҷмӯъ минтақаи Осиёи Марказӣ нисбатан гармтар — 1 дараҷа аз меъёр зиёд гарм ва миқдори бориш аз меъёр кам пешгӯӣ карда мешавад. Ҳарорати миёнаи моҳона моҳи декабр дар Тоҷикистон аз меъёр як дараҷа гармтар мебошад. Дар вилояти Хатлон, навоҳии тобеи марказ ва шаҳри Душанбе ҳарорати миёнаи ҳаво моҳи декабр 6-8 дараҷа гарм, вилояти Суғд 3-4 дараҷа гарм, дар кӯҳҳо аз се дараҷа сард то 2 дараҷа гарм, дар Бадахшон 11-16 дараҷа сард пешгӯӣ карда мешавад. Инчунин тибқи таҳлилҳои ҳавошиносон, моҳи декабр дар ҷумҳурӣ фаромадани туман ва вазидани шамолҳои бошиддат дар назар дошта шудааст»,-гуфт Ҷамила Байдуллоева.
Дар моҳи январ, ки яке аз моҳҳои сарди зимистон ба шумор меравад, ҳарорат ва бориш дар ҷумҳурӣ дар ҳудуди меъёр мебошад. Дар моҳи январ ҳарорати миёнаи моҳона дар вилояти Хатлон +1+3 дараҷа гарм, Суғд аз 0 то 2 дараҷа гарм, дар кӯҳҳо -2-7 дараҷа сард ва дар баландкӯҳҳои қисмати Бадахшон -16-18 дараҷа сардӣ пешгӯӣ мегардад.
Тибқи иттилои ҳавошиносони кишвар, имрӯз, 1 декабр ҳаво дар ҷумҳурӣ гарму бебориш буда, дар вилояти Хатлон шабона +3+5, рӯзона +16+18, дар Суғд шабона +3+5, рӯзона +11+13 дараҷа гарм мешавад. Ҳаво дар рӯзи аввали фасли зимистон дар Бадахшон шабона -4-2 дараҷа сард ва рӯзона +9+11 дараҷа гарм, дар навоҳии тобеи ҷумҳурӣ ва шаҳри Душанбе шабона +2+4 ва рӯзона +15+17 дараҷа гарм пешгӯӣ карда мешавад.
АКС аз бойгонии АМИТ «Ховар»
Президенти Академияи миллии илмҳои Тоҷикистон дар Конференсияи байналмилалии «Илм барои бехатарии ҷаҳон» иштирок намуд
35-СОЛАГИИ ИСТИҚЛОЛИЯТИ ДАВЛАТӢ. Дар Чойхонаи миллӣ барои дар як шабонарӯз қабули 5000 мизоҷ шароит фароҳам оварда мешавад
Ба пешвози 700-солагии Ҳофизи Шерозӣ дар Тоҷикистон барномаҳои фарҳангию маърифатӣ доир мешаванд
ШАҲРИСТОНИ ҲУЛБУК. Бозёфтҳои аз ин ёдгорӣ пайдогардида намунаи санъати олии ҳунармандӣ буда, нотакрор мебошанд
«КОРВОНИ КИТОБ». Ба китобхонаҳои шаҳру ноҳияҳои Бадахшон беш аз 6 ҳазор нусха китоб дастрас мегардад
АМИТ «Ховар» ва ҶСП «Ширкати байнидавлатии телевизион ва радиои «Мир»» Ёддошти тафоҳум ба имзо расониданд
Дар Душанбе мубодилаи барномаҳои фарҳангӣ ва намоиши филмҳо байни Тоҷикистон ва Чин баргузор гардид
Дар мавзуи ташаккул ва рушди синошиносӣ дар Тоҷикистон конфронси илмӣ доир гардид
Рӯзҳои фарҳанги Ҷумҳурии Тоҷикистон дар Ҷумҳурии Тотористони Федератсияи Русия доир гардид
Ду озмоишгоҳи Институти химияи Академияи миллии илмҳои Тоҷикистон бо технологияи муосир муҷаҳҳаз карда шуд
Рӯзҳои фарҳанги Ҷумҳурии Тоҷикистон дар Федератсияи Русия идома доранд
Ёдгориҳои ёфтшуда аз шаҳристони Ҳулбук арзиши баланди илмӣ дошта, дар байни таҳқиқоти солҳои охир беназир маҳсуб мешаванд
