Талоши табибон дар мубориза бо бемории COVID-19. Мавзӯъро барномаи «Дармон»-и Радиои «Ховар» шарҳ медиҳад

ДУШАНБЕ, 27.01.2022 /АМИТ «Ховар»/. Пандемияи COVID-19 дар марҳилаи хатарнок қарор дорад, аммо ҷаҳон барои ба анҷом расонидани ин марҳилаи шадид воситаҳои муайянро соҳиб аст, гуфт директори генералии Созмони ҷаҳонии тандурустӣ Тедрос Гебрейесус зимни брифинге, ки фарогири бемории COVID-19 буд.

Ба зикри мавсуф, дар доираи барномаи таъминоти одилонаи ваксинаи COVAX аллакай  1 млрд вояи ваксина дастрас шудааст, аммо марҳилаи эмгузаронӣ дар ҳамаи кишварҳо на он қадар хуб аст. Ба гуфтаи ӯ, 34 кишвар ҳанӯз натавонистаанд ба 10 фоизи аҳолии худ ваксина гузаронанд, миёни 86 кишвари дигар на кам аз 40 фисади аҳолӣ эм карда шудаанд.

Мутахассисони соҳаи тиб таъкид мекунанд, ки яке аз роҳҳои асосии пешгирии бемории сироятии коронавирус гирифтани ваксинаи зидди бемории мазкур ба шумор меравад.

Дар Ҷумҳурии Тоҷикистон низ тайи чанд шабонарӯзи охир ҳолатҳои нави сироятёбии шаҳрвандон ба бемории COVID-19 ба қайд гирифта мешаванд.

Дар марҳилаи навбатӣ табибони тоҷик бо таҷрибаи андӯхтаи хеш дар мубориза бо ин бемории ҳамагир то чӣ андоза муваффақ хоҳанд гардид ва раванди ваксинагузаронии шаҳрвандон аз ин беморӣ дар кадом сатҳ қарор дорад?

Дар барномаи навбатии «Дармон» ба ин ва дигар саволҳои марбут ба бемории COVID-19 номзади илмҳои тиб, дотсенти ДМТ Маърифат Абдуллоева посух мегӯяд.

Шумо метавонед ин барномаро имрӯз, соати 09:30 (асл),  инчунин  такроран соатҳои 17:30 ва 21:30 дар пешниҳоди муҳаррир ва масъули барнома Нарзулло Ализода аз Радиои «Ховар» дар  мавҷи 101,5  FM бишнавед.