Дар Душанбе масъалаҳои татбиқи лоиҳаи Барномаи озуқавории ҷаҳонӣ мавриди муҳокима қарор гирифтанд

ДУШАНБЕ, 16.02.2022 /АМИТ «Ховар»/. Дар Душанбе ҷаласаи навбатии Кумитаи ҳидояткунандаи Лоиҳаи «Устувории ҷомеаҳои осебпазир ва аз нигоҳи озуқаворӣ ноамн ба пайомадҳои иқлимӣ ва гуногунсозии воситаҳои зиндагӣ дар манотиқи кӯҳии Тоҷикистон», ки аз ҷониби Фонди Иқлими Сабз маблағгузорӣ мегардад, доир шуд.

Дар Кумитаи ҳифзи муҳити зисти назди Ҳукумати Ҷумҳурии Тоҷикистон ба АМИТ «Ховар» иттилоъ доданд, ки дар ҷаласа Раиси Кумитаи ҳифзи муҳити зисти назди Ҳукумати ҷумҳурӣ Баҳодур Шерализода, директори Барномаи озуқавории ҷаҳонӣ дар Тоҷикистон, масъулини возорату идораҳои марбута — Вазорати энергетика ва захираҳои оби Тоҷикистон, Вазорати кишоварзӣ, Агентии хоҷагии ҷангал, Агентии обуҳавошиносӣ ва Маркази лоиҳаҳои Кумитаи ҳифзи муҳити зист иштирок намуданд.

Дар ҷаласа масъалаҳои татбиқи Лоиҳа аз тарафи Барномаи озуқавории ҷаҳонӣ баррасӣ гардида, аз ҷониби аъзои Кумитаи ҳидояткунанда пешниҳодҳои мушаххас оид ба ҷараёни татбиқи лоиҳа ироа гардиданд.

АКС: Кумитаи ҳифзи муҳити зисти назди Ҳукумати ҶТ