Дар ҷамоати деҳоти «Сарвати Истиқлол»-и ноҳияи Кушониён маркази саломатӣ ба истифода дода шуд

ДУШАНБЕ, 22.03.2022 /АМИТ «Ховар»/. Дар доираи сафари кории Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ноҳияи Кӯшониён бахшида ба ҷашни Наврӯзи байналмилалӣ, бо иштироки роҳбарияти ноҳия, Вазири тандурустӣ ва ҳифзи иҷтимоии аҳолӣ Ҷамолиддин Абдулозода, Вазири маориф ва илм Раҳимҷон Саидзода ва дигар меҳмонон дар деҳаи Бофандаи Ҷамоати деҳоти «Сарвати Истиқлол»-и ноҳияи мазкур Маҷмааи «СИМО» иборат аз маркази саломатӣ, маркази савдо, толори варзишӣ, толори баргузории ҷашну маросимҳо ва дорухона ба истифода дода шуд, иттилоъ медиҳад АМИТ «Ховар» бо истинод ба  маркази матбуоти Вазорати тандурустӣ мамлакат.

Гуфта шуд, ки маҷмааи мазкур аз тарафи сокини ҳамин деҳа Фарҳод Челиев бо харҷи беш 600 ҳазор сомонӣ бунёд гардидааст, ки туҳфаи арзанда дар  ҷашни Наврӯз ба сокинони деҳа мебошад.

Маркази саломатии «Само» бо мутахассисони баландӣ тиббӣ таъмин гардида, бо тамоми таҷҳизоти тиббии замонавӣ муҷҷаҳаз гардидааст, ки метавонад ба сокинони деҳа дар сатҳи баланд   хизмат расонад.

Роҳбарияти ноҳия ва меҳмонон тамоми сокинони ин деҳотро бо фарорасии Наврӯзи байналмилалӣ  табрик намуда, ба Фарҳод Челиев барои бунёди иншооти муҳими иҷтимоӣ дар деҳа миннатдории самимии худро баён намуданд.

АКС: Вазорати тандурустӣ ва ҳифзи иҷтимоии аҳолии ҶТ