Дар арафаи ҷашни Наврӯз ба кормандони муассисаи манзилию коммуналии ноҳияи Шаҳринав кумак расонида шуд

ШАҲРИНАВ, 20.03.2022 /АМИТ «Ховар»/. Бо ташаббуси раиси ноҳияи Шаҳринав Ҷаббор Носирзода ва дастгирии соҳибкори саховатпеша Рузибой Шоев ба муносибати ҷашни байналмилалии Наврӯз ҷиҳати дастгирии маъюбону ниёзмандон ба 40 нафар кормандони муассисаи манзилию коммуналии ноҳия, ки баҳри тозаю озода ва обод нигоҳ доштани ноҳия заҳмат мекашанд, кумаки моддӣ,  аз қабили орду равған расонида шуд. Дар ин бора дар Мақомоти иҷроияи ҳокимияти давлатии ноҳияи Шаҳринав ба хабарнигори АМИТ «Ховар» иттилоъ доданд.

Кормандони муассисаи манзилию коммуналии ноҳияи Шаҳринав бо шукургузорӣ аз даврони соҳибистиқлолӣ ва сиёсати дурбинонаи Пешвои миллат  барои пайваста зоҳир намудани чунин  ғамхорӣ  изҳори миннатдорӣ намуда, зикр карданд, ки масъулини ноҳияи Шаҳринав ва соҳибкорону шахсони саховатпеша дар ҳамаи ҷашнҳои миллӣ аввалин шуда онҳоро  табрик намуда, бо кумакҳои хеш меҳнати софдилонаи моро қадрдонӣ менамоянд.

Ҳифзи иҷтимоии ниёзмандону ятимон ва хайру саховат намудан ба онҳо аз сиёсати пешгирифтаи Пешвои миллат муҳтарам Эмомалӣ Раҳмон  маншаъ мегирад.  Мақомоти иҷроияи ҳокимияти давлатии ноҳияи Шаҳринав баҳри  амалӣ гардонидани сиёсати иҷтимоии давлату  ҳукумати мамлакат бобати хидмат ба ниёзмандон, эҳтиёҷмандон ва маъюбон талош менамояд.

АКС: Мақомоти иҷроияи ҳокимияти давлатии ноҳияи Шаҳринав