Вазири маориф ба масъулини соҳа ҷиҳати баланд бардоштани мақоми омӯзгор ва сифати таҳсил дастурҳои мушаххас дод

ДУШАНБЕ, 26.04.2022. /АМИТ «Ховар»/. Вазири маориф ва илми Ҷумҳурии Тоҷикистон дар ҷаласаи назоратии худ ҷиҳати андешидани тадбирҳои судманд доир ба баланд бардоштани мақоми омӯзгор дар ҷомеа, иштироки хонандагону донишҷӯён дар озмунҳои ҷумҳуриявии «Фурӯғи субҳи доноӣ китоб аст», «Илм-фурӯғи маърифат» ва олимпиадаҳо, баланд бардоштани сифати таҳсилот дар муассисаҳои таълимӣ, ба курсҳои бозомӯзӣ ҷалб намудани омӯзгорон, таҳияи дурусти сарбории омӯзгорон ва тасдиқи нақшаҳои таълимӣ дар муассисаҳои таҳсилоти миёнаи касбӣ ба масъулини соҳа дастурҳои мушаххас дод. Дар ин бора дар маркази матбуоти Вазорати маориф ва илми Ҷумҳурии Тоҷикистон иттилоъ доданд.

Ҳамчунин дар ҷаласа оид ба назорати тақсимоти кредитҳо дар ихтисосҳои ҳамгироии муассисаҳои таҳсилоти олии касбӣ, ҷоннок намудани фаъолияти марказҳои инкишофи кӯдак, истифодаи мақсадноки заминҳои назди муассисавӣ ва маблағҳои ҷудошуда барои таъмири мактаб-интернатҳо ва ғайра дастуру супоришҳои мушаххас дода шуданд.

Зимни баргузории ҷаласа иштирокчиён вобаста ба масъалаҳои ҷойдошта гузориш пешниҳод намуда, вобаста ба масъалаҳои муҳокимагардида қарорҳои дахлдор қабул шуданд.

АКС: маркази матбуоти Вазорати маориф ва илми Ҷумҳурии Тоҷикистон