Муҳаммад Боқир Қолибоф дубора раиси парлумони Эрон интихоб шуд
![](https://khovar.tj/wp-content/uploads/2022/05/Mu-ammad-Bo-ir-olibof.jpg)
ДУШАНБЕ, 26.05.2022 /АМИТ «Ховар»/. Вакил аз Теҳрон Муҳаммад Боқир Қолибоф бори дигар ба вазифаи Раиси Маҷлиси (парламенти) Эрон интихоб шуд. Тавре АМИТ «Ховар» иттилоъ медиҳад, дар ин бора рӯзи чаҳоршанбеи 25 май аз ширкати телевизионии IRIB хабар доданд.
Ба иттилои манбаъ, 194 вакили парлумон ба ҷонибдории Қолибоф раъй додаанд. Наздиктарин рақиби ӯ Муртазо Оғо Теҳронӣ 53 овоз гирифтааст.
Қолибоф бори аввал ду сол пеш, охири моҳи майи соли 2020 раиси маҷлиси қонунгузор интихоб шуда буд. Қаблан ӯ дар интихоботи парлумонии моҳи феврали соли 2020 бо касби 1 миллиону 200 ҳазор овоз пешсафи раъйҳо дар пойтахт шуд. Маҷлиси даъвати 11-ум 27 майи соли 2020 расман ба кор шурӯъ кард.
Ҳамон вақт Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ Муҳаммад Боқир Қолибофро ба муносибати Раиси Парлумони Эрон интихоб шуданаш табрик намуданд. Дар барқияи Раиси палатаи болоии Парлумони Тоҷикистон чунин гуфта шуда буд: «Шуморо бо интихоб шуданатон ба мақоми олии Раиси Парлумони Ҷумҳурии Исломии Эрон самимона табрик мегӯям». Рустами Эмомалӣ изҳори итминон карданд, ки густариши равобити дӯстона ва табодули таҷриба миёни палатаи болоии Парлумони Тоҷикистон ва Парлумони Эрон боиси тавсеаи бештари ҳамкории мутақобилан судманди ду кишвар хоҳад шуд.
Муҳаммад Боқир Қолибоф 23 сентябри соли 1961 дар наздикии Машҳад таваллуд шудааст. Аллакай дар синни 19 ӯ ба фаъолияти хизматӣ шурӯъ кард.
Моҳи сентябри соли 2005 ӯ бо 8 раъй аз 15 овоз ба ҷои Маҳмуди Аҳмадинажод раиси пойтахти Эрон таъйин шуд. Муҳаммад Қолибоф дар тӯли ҳашт сол симои шаҳри Теҳронро тағйир дод.
АКС аз манбаъҳои боз