Аз 20 июн ҳаракати қатораи мусофирбар дар масири «Душанбе-Тошканд-Душанбе» шурӯъ мешавад
ДУШАНБЕ, 15.06.2022 /АМИТ «Ховар»/. Аз 20 июн ҳаракати қатораи мусофирбар дар масири «Душанбе — Тошканд — Душанбе» шурӯъ мегардад.
Тавре дар Корхонаи воҳиди давлатии «Роҳи оҳани Тоҷикистон» ба АМИТ «Ховар» иттилоъ доданд, нархи чипта аз 370 сомонӣ дар як самт бо назардошти тахфиф вобаста ба вақти фурӯш оғоз мешавад.
Ин қатора ҳар ҳафта рӯзҳои душанбе аз Душанбе ҳаракат карда, рӯзи сешанбе соати 13:43 ба Тошканд мерасад. Ҳаракат аз Тошканд ҳар ҳафта рӯзи сешанбе соати 16:15 сурат гирифта, ҳар рӯзи чоршанбе вориди Душанбе мешавад.
Масофа аз Душанбе то Тошканд 916 километр буда, вақти сафар 21 соатро дар бар мегирад. Тахмин меравад, ки қатора аз 10 вагон иборат хоҳад буд: 1 люкс, 4 купе, вагон-тарабхона ва 4 вагони класси дуюм.
Тавре АМИТ «Ховар» қаблан хабар дод, дар ин бора 2 июн зимни нишасти матбуотии муштарак Президентҳои Тоҷикистон ва Узбекистон Эмомалӣ Раҳмон ва Шавкат Мирзиёев дар Тошканд иттилоъ дода шуд.
Ҷонибҳо дар бораи ташаккули долонҳои нави транзитӣ ва таъсиси инфрасохтори замонавии логистикӣ, афзоиши ҳамлу нақли ҳавоӣ, роҳи оҳан ва автобусҳо, ташкили кластерҳои кишоварзӣ ва корхонаҳои замонавии истеҳсолӣ, ташкили коркарди меваю сабзавот ва якҷоя ворид шудан ба бозорҳои кишварҳои сеюм ба мувофиқа расиданд.
«Тибқи маълумоти мо, ҳамарӯза ҳудуди 20 ҳазор нафар марзи Тоҷикистон ва Узбекистонро бе мамониат убур мекунанд. Ин рақами хеле муҳим аст. Реҷаи муомилоти озоди молу хизмат таъмин карда шудааст. Ҳаҷми боркашонии ҳавоӣ ва автомобилӣ хеле афзудааст. Мо аҳд кардем, ки дар ояндаи наздик имконияти кушодани нақлиёти роҳи оҳани мусофиркашониро миёни пойтахтҳо ва дигар шаҳрҳои мамлакатҳоямон баррасӣ намоем», — изҳор доштанд Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон.
АКС аз бойгонии АМИТ «Ховар»
Сарвазири мамлакат Қоҳир Расулзода дар ноҳияи Дӯстӣ бо рафти ҷамъоварии ҳосили пахта ва корҳои созандагӣ шинос гардид
Дар Душанбе таҳкими ҳамкорӣ вобаста ба конфронси СИТЕС баррасӣ шуд
Шуруъ аз 16 сентябр дар масири Сиан-Душанбе парвозҳои мустақими ҳавоӣ оғоз мегарданд
Тоҷикистон ва Иттиҳоди Аврупо ҳамкориро дар соҳаи энергетика ва захираҳои об тақвият медиҳанд
Сарвазири мамлакат Қоҳир Расулзода дар ноҳияи Кӯшониён бо ҷараёни корҳои созандагӣ ва хоҷагидорӣ шинос шуд
Сиёсати Тоҷикистон дар самти идоракунии ҳамгироёнаи захираҳои об дар Шветсия муаррифӣ карда шуд
Бонки аврупоии таҷдид ва рушд барои таҷдиди низоми нақлиёти шаҳри Душанбе маблағ ҷудо менамояд
Дар Минтақаи озоди иқтисодии «Данғара» татбиқи лоиҳаҳои муштарак бо сармоягузорони Чин баррасӣ карда шуд
Дар Неругоҳи барқи обии «Роғун» роботи махсуси кафшерӣ ба истифода дода шуд
Роҳҳои афзоиш додани ҳаҷми истеҳсол ва коркарди нахи пахта дар Тоҷикистон баррасӣ гардид
Дар Чин масъалаи вазъи заминҳои шӯр ва ишқордор баррасӣ шуд
Ангури хуштаъми Тоҷикистон дар бозорҳои шаҳри Самара ба фурӯш гузошта шудааст
