БМТ ҷиҳати пешгирии таъсири буҳрони молиявӣ ба низоми бонкии кишвар нақшаи зиддибуҳронӣ таҳия намудааст
ДУШАНБЕ, 18.07.2022 /АМИТ «Ховар»/. Ҷиҳати пешгирии таъсири омилҳои берунӣ ва буҳрони молиявӣ ба низоми бонкии кишвар роҳбарияти Бонки миллии Тоҷикистон (БМТ) нақшаи тадбирҳо таҳия намудааст. Ин нуктаро имрӯз зимни нишасти матбуотӣ муовини Раиси БМТ Фирдавс Толибзода дар посух ба саволи хабарнигори АМИТ «Ховар» баён дошт.
Фирдавс Толибзода зимни тавзеҳи вазъи макроиқтисодӣ ва фаъолияти низоми бонкии Тоҷикистон дар шаш моҳи аввали соли равон гуфт, ки Бонки миллии Тоҷикистон дар ин давра татбиқи сиёсати пулию қарзиро баҳри мусоидат ба рушди иқтисодиёт, устувории низоми бонкӣ ва нигоҳдории сатҳи муътадили нархҳои дохилӣ равона намуд. Дар ин давра меъёри бозтамвил ҳамчун фишанги асосии сиёсати пулию қарзӣ барои анҷом додани амалиёти монетарӣ дар моҳҳои январ –июни соли равон бетағйир дар сатҳи 13,25 фоизи солона нигоҳ дошта шуд.
Муовини раиси Бонки миллии Тоҷикистон изҳор дошт, ки қурби расмии доллари амрикоӣ нисбат ба пули миллӣ-сомонӣ дар ин давра ба андозаи 6,57 сомонӣ (аз 11,3000 сомонӣ дар санаи 31 декабри соли 2021 то ба 10,5578 сомонӣ дар санаи 30 июни соли 2022) паст шуд. Ин нишондиҳанда дар ҳамин давраи соли гузашта ба андозаи 0,18 фоиз (аз 11,3000 сомонӣ дар санаи 31.12.2020 то ба 11,3210 сомонӣ дар санаи 30.06.2021) баланд шуда буд.
Фирдавс Толибзода зикр намуд, ки маҷмӯи маҳсулоти дохилии /ММД/ кишвар дар ин давра бо арзиши номиналӣ ба 46,2 миллиард сомонӣ баробар гардида, афзоиши воқеии он 7,4 фоизро ташкил намуд. Ба рушди иқтисодиёт дар ин давра асосан афзоиши истеҳсоли маҳсулоти саноатӣ 17,3 фоиз, гардиши савдои чакана 9,3 фоиз, хизматрасонии пулӣ 12,8 фоиз, кишоварзӣ 7,2 фоиз ва соҳаи сохтмон 2,5 фоиз мусоидат намуд.
Фирдавс Толибзода ҳамчунин итттиилоъ дод, ки сатҳи таваррум дар ин давра 4,1 фоизро ташкил дод, ки нисбат ба ҳамин давраи соли қаблӣ 0,2 банди фоизӣ зиёд аст. Ин нишондиҳанда асосан аз ҳисоби болоравии нархи маҳсулоти хӯрокворӣ 7,0 фоиз ва молҳои ғайрихӯрокворӣ 2,3 фоиз ба амал омад. Инчунин дар ин давра пастравии нархи арзиши хизматрасониҳои пулӣ ба аҳолӣ ба қайд гирифта шуд, ки 1,1 фоизро ташкил дод. Таварруми солона дар ин давра ба 8,3 фоиз баробар гардид, ки дар қиёс ба ҳамин давраи соли гузашта 0,7 банди фоизӣ кам мебошад.
Марзия САИДЗОДА,
АМИТ «Ховар»
АКС: АМИТ «Ховар»
Дар Душанбе нишасти нуздаҳуми Шурои роҳбарикунандаи СПЕКА баргузор гардид
Байни Агентии содироти Тоҷикистон ва Кумитаи рушди содироти Арабистони Саудӣ оид ба рушди содироти ғайринафтӣ Ёддошти тафоҳум ба имзо расид
Ҷаласаи гурӯҳи коршиносон оид ба ташкили бозори минтақавии неруи барқи мамлакатҳои Созмони ҳамкории иқтисодӣ баргузор шуд
Сулаймон Султонзода дар Нишасти дуюми вазирони мақомоти ҳифзи ҳуқуқи давлатҳои аъзои Созмони ҳамкории исломӣ иштирок намуд
Имсол аз Тоҷикистон беш аз ҳазор тонна хуч ба хориҷи мамлакат содирот гардидааст
ҚУРБИ АСЪОР: дар Тоҷикистон 1 рубли русӣ аз 0.0963 то 0.1020 сомонӣ муқаррар шудааст
Дар Риёз ҷаласаи чоруми Кумитаи муштараки Тоҷикистон ва Арабистони Саудӣ оид ба ҳамкории иқтисодӣ, тиҷоратӣ ва сармоягузорӣ доир гардид
Дар шаҳри Кӯлоб филиали «Саноатсодиротбонк» ифтитоҳ гардид
Таҷрибаи Ҷумҳурии Корея оид ба истифодаи технологияҳои ҳушманд дар соҳаи кишоварзӣ дар ноҳияҳои Тоҷикистон баррасӣ гардид
Вазири энергетикаи Тоҷикистон дар Риёз дар чорабинии канорӣ оид ба диверсификатсияи манбаъҳои энергия иштирок намуд
Конфронси 28-уми байналмилалии сармоягузорӣ дар шаҳри Риёзи Подшоҳии Арабистони Саудӣ ба анҷом расид
Дар шаҳри Риёз ҳамоиши доираҳои тиҷоратию сармоягузории Тоҷикистон ва Арабистони Саудӣ баргузор гардид
