Имрӯз дар Хуҷанд Мусобиқаи байналмилалии Ҷоми Президенти Тоҷикистон оид ба дзюдо оғоз мешавад

ДУШАНБЕ, 19.09.2022 /АМИТ «Ховар»/. Имрӯз, 19 сентябр дар Қасри варзиши шаҳри Хуҷанд​ Мусобиқаи 9-уми байналмилалӣ оид ба гӯштини дзюдо барои дарёфти Ҷоми Президенти Тоҷикистон оғоз ёфта, то 20 сентябр идома меёбад, иттилоъ медиҳад шореҳи варзиши АМИТ «Ховар».

Мусобиқа бо иқдоми Федератсияи дзюдои Тоҷикистон ва Кумитаи кор бо ҷавонон ва варзиши назди Ҳукумати ҷумҳурӣ дар ҳамкорӣ бо мақомоти иҷроияи ҳокимияти давлатӣ дар вилояти Суғд аз рӯи 5 категорияи вазнӣ миёни мардон: -66кг, -81кг, -90кг, -100кг, +100кг, инчунин дар ду вазн миёни занон: 57кг ва -63 кг баргузор мегардад.

Барои ширкат дар мусобиқа варзишгарон аз кишварҳои хориҷӣ даъват шудаанд. Ба ғолибону ҷоизадорони мусобиқа дар ҳар вазн ҷоизаҳои молӣ супурда мешаванд. Ба ғолиби ҷойи аввал 40 000 сомонӣ, барои ҷойи дуюм 20 000 сомонӣ ва барои ҷойҳои сеюм 10 000 сомонӣ муқаррар шудааст.

Соли гузашта дар ин мусобиқа, ки дар шаҳри Душанбе барпо шуд, дар вазни 66 кг — Дилшодбек Юлдошев (Узбекистон), дар вазни 81 кг — Умар Расулов (Тоҷикистон), дар вазни 90 кг — Комроншоҳи Устопириён (Тоҷикистон) ва дар вазни +100 кг Темур Раҳимов (Тоҷикистон) ғолиб омада буданд.

Мавриди ёдоварист, ки Ҷоми Президенти Тоҷикистон оид ба гӯштини дзюдо бори аввал соли 2013 дар ду вазн (-81кг, вазни мутлақ +90кг) ва солҳои 2014, 2015, 2016, 2017 дар вазни мутлақ доир гардида буд. Солҳои 2018, 2019 ва 2021 рақобатҳо тибқи қоидаҳои Федератсияи байналмилалии дзюдо аз рӯи 7 вазн миёни мардҳо сурат гирифтанд.

Соли 2020 мусобиқа бо сабаби пандемияи коронавирус баргузор нашуд.

АКС аз манбаъҳои боз