ҶОМИ ОСИЁ-2023 ОИД БА ФУТБОЛ. Тоҷикистон дар аввалин бозӣ бар дастаи мунтахаби наврасони Муғулистон ғолиб омад

ДУШАНБЕ, 06.10.2022. /АМИТ «Ховар»/. Шоми дирӯз дар Варзишгоҳи марказии ҷумҳуриявии шаҳри Душанбе дастаи мунтахаби наврасони то 17- солаи  Тоҷикистон оид ба футбол таҳти роҳбарии Раҳматулло Фузайлов дар оғози мусобиқаи интихобии Ҷоми Осиё-2023 дар гурӯҳи «Н» бар  дастаи  мунтахаби наврасони то 17-солаи  Муғулистон бо ҳисоби калони  3:0 пирӯз шуд, хабар медиҳад шореҳи варзиши АМИТ «Ховар»  бо истинод ба  Федератсияи футболи Тоҷикистон.

Дар дақиқаи 28-уми дидор бозигари Муғулистон Итгел Балчиндрож ба дарвозаи дастааш гол зада, ҳисобро кушод. Ду голи дигарро Абубакр Сулаймонов ва Шеравган Саидов  дар ин бозии ҷолиб ба нишон расониданд.

Дар даври ниҳоии мусобиқаи интихобии Ҷоми Осиё-2023 дастаи мунтахаби наврасони то 17-солаи  Тоҷикистон   9 октябр бо ҳамсолони худ аз Афғонистон бозӣ мекунад. Ин вохӯрӣ дар Варзишгоҳи марказии ҷумҳуриявии Душанбе, соати 19:00 оғоз мешавад.

Дар марҳилаи интихобии Ҷоми Осиё-2023 миёни дастаҳои мунтахаби наврасони то 17-сола ҳамаи дастаҳои қора дар 10 гурӯҳ иштирок доранд. Тибқи низомнома, ғолибони ҳамаи гурӯҳҳо ва 5 дастаи беҳтарини гурӯҳҳо ба марҳилаи финалӣ, ки моҳи майи соли оянда дар Баҳрайн баргузор мешавад, роҳхат мегиранд. 

                                                 АКС: Федератсияи футболи Тоҷикистон