Кишоварзони Тоҷикистон дар майдони беш аз 172 ҳазору гектар кишти тирамоҳӣ мегузаронанд

ДУШАНБЕ, 07.11.2022 /АМИТ «Ховар»/. Барои истеҳсоли маҳсулоти кишоварзӣ дар соли 2023 тибқи дурнамо, деҳқонони мамлакат дар майдони 172 ҳазору 886 гектар кишти тирамоҳӣ ва зироати барвақтӣ мегузаронанд, иттилоъ медиҳад АМИТ «Ховар» бо истинод ба Раёсати растанипарварии Вазорати кишоварзии мамлакат.

Дар асоси маълумоти Раёсати растанипарварӣ, то 28 октябр кишоварзони ҷумҳурӣ 38 фоизи дурнаморо иҷро намуданд.

Аз нақшаи умумии кишти тирамоҳӣ 157 133 гектарро зироати ғалладонагӣ ва 15753 гектарро сабзавоти барвақтӣ ташкил медиҳанд.

Вазорати кишоварзӣ дар асоси дастуру супоришҳои Ҳукумати Ҷумҳурии Тоҷикистон бо мақсади таъмини амнияти озуқавории мамлакат, танзими нарх дар бозорҳои истеъмолӣ ва афзун намудани иқтидори содиротии маҳсулоти кишоварзӣ дар хоҷагиҳои деҳқонӣ ва ҷамоавии ҷумҳурӣ дурнамои кишти тирамоҳӣ ва барвақтии зироати кишоварзиро вусъат бахшида истодааст.

АКС аз манбаъҳои боз