ДИҚҚАТ! СУТ огоҳ мекунад: ҳар ҳафта COVID-19 ҷони 10 ҳазор нафарро мерабояд

ДУШАНБЕ, 05.01.2023 /АМИТ «Ховар»/. Новобаста ба пешрафтҳои чашмрас дар самти мубориза бо COVID-19 хатарҳои он ҳанӯз пурра бартараф карда нашудаанд. Дар баробари ин нобаробарии дастрасӣ ба чораҳои пешгирӣ, ташхис ва табобати сирояти коронавирус низ боқӣ мемонад.

Дар ин бора дирӯз, 4 январ дар нишасти матбуотӣ дар Женева директори генералии СУТ Тедрос Гебрейесус хабар дод, иттилоъ медиҳад АМИТ «Ховар» бо истинод ба хадамоти матбуоти ин созмон.

Ба гуфтаи ӯ, ҳар ҳафта аз COVID-19 даҳ ҳазор нафар мефавтанд. «Ин танҳо маълумотест, ки мо медонем. Эҳтимол рақамҳои воқеӣ хеле зиёданд»,-зикр намуд Тедрос. Ӯ иттилоъ дод, ки мизони бистаришавӣ дар беморхона низ вақтҳои охир афзоиш ёфтааст, бахусус дар нимкураи шимолӣ, ки зукоми мавсимӣ низ дар он ҷо паҳн мешавад.

Дар айни замон СУТ афзоиши бемориро дар назар дорад, на фавтнокиро, зеро воситаҳои мавҷуда аз бемориҳои шадид ва марг муҳофизат мекунанд.

Илова бар ин, ба гуфтаи Мари ван Керхове, мутахассиси Созмони умумиҷаҳонии тандурустӣ, дар бисёре аз кишварҳо вирусҳои дигари роҳи нафас гардиш мекунанд ва ба далели баргузории чорабиниҳои идона, ки мардуми зиёдро ҷамъ меоваранд, эҳтимоли афзоиши сироятёбӣ дучанд мешавад.

 Шаҳлои САДРИДДИН,
АМИТ «Ховар»

ДАР АКС: тозакунии хиёбонҳо дар Шанхай. Акс аз Unsplash/Sam Balye