«ДАСТАРХОНОРОӢ». Дар мақомоти Ваколатдор оид ба ҳуқуқи инсон бахшида ба Наврӯз маҳфил доир гардид

ДУШАНБЕ, 14.03.2023 /АМИТ «Ховар»/. Бо ташаббуси Шӯрои занони мақомоти Ваколатдор оид ба ҳуқуқи инсон дар Ҷумҳурии Тоҷикистон бахшида ба Ҷашни байналмилалии Наврӯз маҳфили «Дастархонороӣ» доир карда шуд. Дар ин хусус ба АМИТ «Ховар» дар мақомоти мазкур хабар доданд.

Халқи тоҷик на танҳо дар бахши омодасозии анвои таомҳои миллӣ, балки дар дастархонороӣ низ маҳорати баланд дошта, хони оростаи ҳунармандони он на фақат чорабиниҳои хонаводагӣ, балки ҷашнҳои пуршукўҳи идонаи миллиро низ зебу зиннати хосса мебахшад.

Анъанаи дастархонороии тоҷикон бо зарфияти хоси худ, бахусус аз лиҳози усули оростан ва унсурҳои истифодаи анвои маҳсулоти миллӣ дар ҷаҳон беназир аст. Ин аст, ки фарҳанги дастархонороӣ ҷузъе аз анъанаҳои фарҳанги меҳмоннавозии тоҷикон ба шумор меравад.

Аз ин лиҳоз, занон ва духтарони дастгоҳи Ваколатдор оид ба ҳуқуқи инсон дар арафаи иди Наврӯз бо ба бар намудани либоси миллӣ кӯшиш ба харҷ доданд, ки дастархони идонаро бо неъматҳои асили тоҷикӣ ороянд.

Гузаронидани чунин маҳфилҳо барои эҳёи анъанаҳои миллӣ аҳамияти калон дошта, барои ба насли оянда боқӣ гузоштани оинҳои миллати тоҷик мусоидат мекунад.

АКС: Ваколатдор оид ба ҳуқуқи инсон дар Ҷумҳурии Тоҷикистон