Formula55 сарпарасти расмии Федератсияи таэквондо ва кикбоксинг WAKO-и Тоҷикистон шуд ⠀

ДУШАНБЕ, 03.03.2023 /АМИТ «Ховар»/. Имрӯз дар Қасри теннис ва варзиши обии шаҳри Душанбе нишасти матбуотӣ баргузор гардид, ки дар он байни роҳбарияти аввалин ширкати букмекерии «Формула 55», Таэквондо ИТФ ва кикбоксинги Тоҷикистон шартномаи сарпарастӣ ба имзо расид. Дар ин хусус ба АМИТ «Ховар» дар ширкати «Formula55» хабар доданд.

Дар мулоқот роҳбарияти ширкати «Формула-55» ва президенти Федератсияи таэквондо ва кикбоксинг WAKO-и Тоҷикистон Мирсаид Яҳёев ва намояндагони ВАО иштирок доштанд. ⠀

Дар нишасти матбуотӣ президенти федератсия дар бораи фаъолияти пурсамар ва натиҷаҳои варзишгарон ҳарф зада, нақшаҳои худро барои ояндаи наздик баён кард.

Тавре иттилоъ дода шуд, талошҳои Федератсияи байналмилалӣ барои шомил намудани таэквандо ИТФ ва кикбоксинг ба Бозиҳои тобистонаи олимпӣ зиёд аст. Агар ин ҳадаф амалӣ шавад, он вақт барои варзишгарони тоҷик низ имкони хуби муаррифии Тоҷикистон дар ин чорабинии бузурги варзишӣ пайдо мешавад.

⠀ Бояд гуфт, ки Федератсияи таэквондо ва кикбоксинг WAKO-и Тоҷикистон аз рӯзҳои аввали таъсис дар мамлакати мо яке аз федератсияҳои фаъол ва маъруф ба шумор меравад, зеро зиёда аз 30 сол аст, ки фаъолияти пурсамар дорад.

Федератсия дар тӯли фаъолияти хеш 59 қаҳрамони ҷаҳонро ба камол расонида, феълан дар самти тарбияи насли наврасу ҷавон нақши муҳим мебозад. ⠀

Ёдрас мешавем, ки ширкати «Formula55» дар тамоми фаъолияти худ мунтазам чорабиниҳои гуногуни варзишӣ, варзишгарон, инчунин клубҳои футбол ва федератсияҳоро дастгирӣ менамояд. Ҳамзамон ширкат дар ташкили мусобиқаи кушоди баскетбол, мусобиқаи байналмилалии волейбол ва дигар ҷорабиниҳои гуногуни варзишӣ саҳми арзанда мегузорад.

АКС аз ширкати «Formula55»