«ДИЛИ Ӯ РАВШАН АЗ СӮЗИ ДАРУН БУД». Дар Душанбе маҷмуаи тозанашр муаррифӣ карда шуд

ДУШАНБЕ, 27.04.2023 /АМИТ «Ховар»/. Имрӯз дар шаҳри Душанбе китоби «Дили ӯ равшан аз сӯзи дарун буд», ки ба ҳаёту фаъолияти собиқ сармуҳаррири рӯзномаи «Садои мардум»-нашрияи Парлумони мамлакат Бобоҷон Абдулвоҳид бахшида шудааст, муаррифӣ гардид.

Маҷмуа аз се бахш иборат буда, намунаҳо аз осори журналистии Бобоҷон Абдулвоҳид, аксҳо аз лаҳзаҳои корӣ ва дар ҳалқаи пайвандон, инчунин меҳрномаҳои ҳампешагону ҳамнишинонро дар бар мегирад.

Ба гуфтаи мураттиби китоб Шарофат Абдулвоҳидова, ба се бахш ҷудо гардидани муҳтавои китоб ба хотири осонхон шудан ва калид ба дасти хонанда додан аст.

Бахши аввал «Ҳамсадои мардум» ном дошта, намунаҳо аз осори журналист дар тӯли солҳои 1976-2008-ро фаро гирифтааст, ки матолиби гуногунмавзуъ ва гуногунжанри он дар саҳифаҳои нашрияҳои «Роҳи ленинӣ», «Ҳақиқати Хатлон» ва «Садои мардум» ба табъ расидаанд. Ин намунаҳо муште аз хирвори рӯзноманигории Бобоҷон Абдулвоҳид, гувоҳи касбият-тезкорӣ, эҳсоси набзи рӯз, расидагӣ ба дарду ниёзи мардум, дарки муҳимияти мавзуъ, огоҳӣ аз раванди воқеаву ҳодисоти айём аст, ки журналист дар ҳар давру айём бояд соҳиби он бошад.

Унвони бахши дуюм «Аксҳои гӯё» худ бозгӯйи ҳол аст. Ҳар акс инъикоси як лаҳза аз рӯзгорони бо ҳадаф, бо хоҳиш, бо ваколат, бо салоҳият, бо ният, бо орзу сипаридаи Бобоҷон Абдулвоҳид мебошад, ки ҳоло лаҳзаҳои ёдгори умр гардидаанд.

Мураттиби маҷмуа бахши сеюмро «Аз ёдҳо, аз ёдҳо» унвон додааст. Шарикдарсони донишгоҳӣ, ҳамкасбони овони ҷавонӣ, ҳамқаламони ҳамкори солҳои охир дар пораёдҳо меҳру сипоси ошноиро ба ҷӯраи ҳамнишин, ба шарикдарси муҳиб, ба роҳбари сахтгиру меҳрубон, ба сарбони ғамхори оила баён дошта, хотири рӯзноманигорро пос доштаанд.

Ҳамзамон хонандагон имкон доранд намунаҳои мақолаҳои рӯзноманигор, аз ҷумла «Маҷлиси хонагӣ», «Пош бо дасти табаррук дони аввал», «Боз як соли ғаму шодӣ гузашт…», «Агар дар ҳарфи ман дидӣ хатое…», «Ду гулдаста» ва дигар матлабҳои ҷолибро мутолиа намоянд.

Шаҳлои САДРИДДИН,
АМИТ «Ховар»,

АКС: АМИТ «Ховар»