Дар вилояти Суғд дар майдони зиёда аз 152,6 гектар кишти зироати баҳорӣ гузаронида шуд

ДУШАНБЕ, 09.05.2023 /АМИТ «Ховар»/. Дар вилояти Суғд нақшаи кишти зироати баҳорӣ 174 735 гектарро ташкил дода, то имрӯз дар майдони 152 645 гектар зироат кишт  шудааст. Дар ин хусус 5 май зимни машварати кории Раиси вилояти Суғд Раҷаббой Аҳмадзода иттилоъ дода шуд, хабар медиҳад АМИТ «Ховар» бо истинод ба хадамоти матбуоти Раиси вилоят.

Дар машварат​ ҷараёни корҳои кишоварзӣ дар шаҳру ноҳияҳои вилоят мавриди баррасӣ қарор гирифт.

Дар машварат аз раисони шаҳру ноҳияҳо ва масъулини соҳаи кишоварзӣ оид ба вазъи корҳои саҳроӣ ва иҷрои нақшаи пешбинишудаи зироати киштшаванда пурсиш ба амал оварда шуд.

«Тавре таъкид карда шуд, дар вилоят нақшаи кишти зироати баҳорӣ 174 735 гектарро ташкил дода, то имрӯз дар 152 645 гектар кишт гузаронида шудааст», — омадааст дар хабари манбаъ.

Бо таҳлили ҷараёни корҳои саҳроӣ ба раисони шаҳру ноҳияҳо дастур дода шуд, ки​ ҳар соати мавсим бояд самаранок истифода шуда, киштукори ҳама намуди зироати баҳорӣ дар муҳлати муайян гузаронида шавад.

«Вазифаи роҳбарону масъулини шаҳру ноҳияҳо мусоидат дар ҳалли масъалаҳои дохилихоҷагӣ, ​ сари вақт таъмин намудани хоҷагиҳои ҷамоавию инфиродӣ бо техника ва тухмии хушсифат мебошад, —​ таъкид намуд роҳбари вилоят ва иброз дошт, ки​ барои бо​ об таъмин кардани хоҷагиҳо, фаъолияти муназзами дастгоҳу таҷҳизоти иншооти обрасонӣ талаби замони имрӯза мебошад». ​

Раёсати беҳдошти замин ва хоҷагии об дар вилоят ва сохторҳои он дар маҳалҳо вазифадор карда шуданд, ки ҷиҳати таъмини обрасонии  шабонарӯзӣ тадбирҳои судманд андешанд.​

Ҳамзамон супориш дода шуд, ки нақшаи кишти ғалла,​ шолӣ, пахта, картошка, пиёз ва сабзавоту полезиҳо дар кӯтоҳтарин фурсат иҷро карда шавад.

АКС аз бойгонӣ