Хатмкунандагони Донишгоҳи миллии Тоҷикистон минбаъд соҳиби намунаи ягонаи дипломи таҳсилоти олии касбӣ мешаванд

ДУШАНБЕ, 27.07.2023. /АМИТ «Ховар»/. Минбаъд ба хатмкунандагони Донишгоҳи миллии Тоҷикистон намунаи ягонаи дипломи таҳсилоти олии касбӣ дода мешавад, ки он аз дипломҳои қаблӣ ва дигар муассисаҳои олии мамлакат фарқ менамояд. Чунин иброз дошт ректори Донишгоҳи миллӣ, доктори илмҳои иқтисодӣ, профессор Қобилҷон Хушвақтзода имрӯз зимни нишасти матбуотӣ.

Ба гуфтаи ӯ, намунаи дипломи ин муассиса бо қарори Ҳукумати Ҷумҳурии Тоҷикистон аз 26 июни соли 2023 тасдиқ шуда, дар самти ба расмият даровардани ҳуҷҷати намунаи давлатӣ иқдоми аввалин мебошад.

Шумораи донишҷӯён дар шашмоҳаи аввали соли 2023  22 ҳазору 317 нафар буда, аз ин шумора 16 ҳазору 898 нафар дар шуъбаи рӯзона, 4842 нафар дар шакли таҳсилоти фосилавӣ, 580  нафар дар магистратура ва доктор phD таҳсил менамоянд.

Ҳамзамон дар 14 факултети донишгоҳ донишҷӯён тибқи квотаи Президенти Ҷумҳурии Тоҷикистон таҳсил менамоянд, ки теъдоди онҳо 249 нафар мебошад.

Зарангези ЛАТИФ,
АМИТ «Ховар»

АКС: АМИТ «Ховар»