«Тоҷикаэронавигатсия»: Ифтитоҳи долони нави ҳавоии «FUNSE» ва роҳи нави байналмилалии аэронавигатсионии «Z767» ба афзоиши парвозҳои транзитӣ мусоидат менамояд

ДУШАНБЕ, 29.07.2023/АМИТ «Ховар»/. Корхонаи воҳиди давлатии «Тоҷикаэронавигатсия» аз ифтитоҳи долони нави ҳавоии «FUNSE» дар сарҳади Ҷумҳурии Узбекистон ва Ҷумҳурии Тоҷикистон ва роҳи нави байналмилалии аэронавигатсионии «Z767» иттилоъ медиҳад.

Тавре муовини аввали директори генералии КВД «Тоҷикаэронавигатсия» Даврон Шодмонбекзода 28 июл дар нишасти матбуотӣ ба намояндагони расонаҳои матбуотӣ гуфт, «долони нави ҳавоии «FUNSE» ва роҳи нави байналмилалии аэронавигатсионии «Z767» бо мақсади татбиқи барномаи табдил додани Тоҷикистон ба давлати транзитӣ, ҳамчунин зиёд намудани теъдоди парвозҳои транзитӣ тавассути фазои ҳавоии Ҷумҳурии Тоҷикистон дар соли равон ба истифода дода шуданд».

Хамзамон таъкид шуд, ки бо мақсади татбиқи лоиҳаи нақшаҳои нави «WGS-84» ва татбиқи амалии лоиҳаҳои грантии марбут ба ворид намудани «Навигатсия дар асоси хусусиятҳо PBN», аз ҷониби КВД «Тоҷикаэронавигатсия» бо Агентии Ҷопон оид ба ҳамкории байналмилалӣ (JICA) ва КВД «Аэрогеодезияи Душанбе» ду санади ҳамкорӣ таҳия ва тасдиқ гардид.

Дар нишасти матбуотӣ бо натиҷагирӣ аз фаъолияти ниҳодҳои авиатсионӣ ва ширкатҳои ҳавопаймоии мамлакат таъкид гардид, ки соли равон КВД «Тоҷикаэронавигатсия» ба 25 246 ҳавопаймо

хизмат расонидааст, ки ин нишондиҳанда нисбат ба шашмоҳаи якуми соли гузашта 4 164 ё 20 фоиз зиёд мебошад.

Гуфта шуд, ки теъдоди парвозҳои транзитӣ дар ин давра 12919 ададро ташкил намуд, ки дар қиёс нисбат ба ҳамин давраи соли қаблӣ 1700 ё 15 фоиз зиёд аст. Бо назардошти зиёд гардидани иҷро, ҳаҷми парвоз ва хатсайрҳо дар ин давра даромади умумии корхона афзоиш ёфта, ба зиёда аз 152 миллион сомонӣ расид, ки нисбат ба шашмоҳаи якуми соли гузашта беш аз 21 миллион ё 116 фоиз зиёд мебошад. Хароҷот зиёда аз 102 миллион сомониро ташкил медиҳад.

КВД «Тоҷикаэронавигатсия» дар ин давра ба буҷети давлат дар маҷмуъ беш аз 27,8 миллион сомонӣ пардохт намуд, ки дар қиёс нисбат ба ҳамин давраи соли гузашта 5,4 миллион сомонӣ ё 24,4 фоиз зиёд мебошад.

Марзия САИДЗОДА,
АМИТ «Ховар»

АКС: КВД «Тоҷикаэронавигатсия»