НИШАСТИ МАТБУОТӢ. Дар Тоҷикистон 82 лоиҳаи сармоягузории давлатӣ ба маблағи 49,1 миллиард сомонӣ амалӣ гардида истодааст

ДУШАНБЕ, 13.08.2023 /АМИТ «Ховар»/. Кумитаи давлатии сармоягузорӣ ва идораи амволи давлатии Ҷумҳурии Тоҷикистон иттилоъ медиҳад, ки соли равон дар мамлакат 82 лоиҳаи сармоягузории давлатӣ ба маблағи умумии 49,1 миллиард сомонӣ баробар ба 4,50 миллиард доллар амалӣ гардида истодааст. Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Саъдӣ Қодирзода 10 август дар нишасти хабарӣ дар Душанбе ба намояндагони расонаҳои хабарӣ иттилоъ дод, ки аз аввали татбиқи лоиҳаҳои давлатӣ ҳамагӣ 21,3 миллиард сомонӣ ё 1,95 миллиард доллар аз худ гардидааст.

Ҳамзамон дар ин давра дар доираи лоиҳаҳои амалкунанда беш аз 3,2 миллиард сомонӣ ё 298,7 миллион доллар аз худ шудааст, ки ин дар маҷмуъ ба 106 фоизи нақшаи молиявии давраи ҳисоботӣ баробар мебошад.

Мавсуф афзуд, ки аз ин шумора дар соҳаҳои энергетика 17 лоиҳа ба маблағи 873,0 миллион сомонӣ (80,0 миллион доллар), нақлиёт- 14 лоиҳа ба маблағи 1 315,1 миллион сомонӣ (120,5 миллион доллар), тандурустӣ- 9 лоиҳа ба маблаги 260,0 миллион сомонӣ (23,8 миллион доллар), хоҷагии манзилию коммуналӣ- 13 лоиҳа ба маблағи 196,4 миллион сомонӣ (18,0 миллион доллар), кишоварзӣ дар доираи 3 лоиҳа 88,4 миллион сомонӣ (8,1 миллион доллар), экология ва ҳолатҳои фавқулода дар доираи 8 лоиҳа 81,0 миллион сомонӣ (7,4 миллион доллар), маориф 6 лоиҳа ба маблағи 134,2 миллион сомонӣ (12,3 миллион доллар), ирригатсия/обёрӣ 4 лоиҳа 77,5 миллион сомонӣ (7,1 миллион доллар), соҳаҳои гумрук, молия, сайёҳӣ ва ғайра 8 лоиҳа ба маблағи 233,5 миллион сомонӣ (21,4 миллион доллар) амалӣ гардид.

Инчунин таъкид шуд, ки барои амалисозии лоиҳаҳои сармоягузории давлатӣ дар соҳаҳои афзалиятноки мамлакат бо шарикони рушд созишномаҳои нав ба маблағи беш аз 2,3 миллиард сомонӣ, муодил ба 208,6 миллион доллар ба имзо расонида шуданд, ки 99 фоизи онро маблағҳои грантӣ ташкил медиҳад.

Марзия САИДЗОДА,
АМИТ «Ховар»

АКС: АМИТ «Ховар»