ҲАМКОРӢ БАЙНИ МИНТАҚАҲОИ ТОҶИКИСТОН ВА ТУРКИЯ ТАҚВИЯТ МЕЁБАД. Бо ин мақсад Раиси ноҳияи Данғара дар вилояти Бурсаи Туркия қарор дорад

ДУШАНБЕ, 18.10.2023. /АМИТ «Ховар»/. 17 октябр Раиси ноҳияи Данғараи вилояти Хатлон Раҳмон Исломиддин ҷиҳати шиносоӣ бо фаъолияти  корхонаҳои саноатӣ ва омўзиши таҷрибаи пешқадам  ба вилояти Бурсаи Туркия сафар намуд. Дар ин хусус ба АМИТ «Ховар» дар Мақомоти иҷроияи ҳокимияти давлатии ноҳияи Данғара хабар доданд.

Зимни вохўрӣ бо роҳбарияти Палатаи савдо ва саноати вилояти Бурса имконияти ҳамкории байниминтақавӣ дар соҳаҳои кишоварзӣ, саноати нассоҷию хӯрокворӣ, инчунин тайёр намудани мутахассисон дар соҳаҳои мухталиф мавриди баррасӣ қарор гирифт.

Давоми рӯз ҳайати меҳмонон бо корхонаҳои истеҳсоли маҳсулоти консервию яхкардашуда, дўхти либосҳои кӯдакона ва матоъҳои гуногун шинос шуданд.

Дар доираи сафари корӣ ба Ҷумҳурии Туркия Раиси ноҳияи Данғара Раҳмон Исломиддин бо роҳбарияти Палатаи савдо ва саноати  вилояти Бурса мулоқот намуд.

Зимни мулоқот ҷонибҳо масъалаҳои муҳими ҳамкорӣ, аз ҷумла дар самти  тиҷоратро мавриди баррасӣ қарор доданд.

Имрӯз дар идомаи сафари корӣ ба Ҷумҳурии Туркия ҳайати ноҳияи Данғара бо роҳбарии  Раҳмон Исломиддин дар ноҳияи Омонгазии вилояти Бурса бо фаъолияти корхонаи ресандагӣ ва дӯзандагӣ шинос шуданд.

Ҷонибҳо шартномаи ҳамкориро вобаста   ба дар сатҳи баланд омода намудани мутахассисон дар корхонаҳои ресандагӣ ва дӯзандагӣ ба имзо расонданд.

АКС: Мақомоти иҷроияи ҳокимияти давлатии ноҳияи Данғара