ШАХСИ ХИРАДМАНД. Имрӯз бахшида ба 115-солагии Қаҳрамони Тоҷикистон, аллома Бобоҷон Ғафуров дар Муассисаи нашриявии «Ирфон» ҳамоиш доир гардид

Декабрь 27, 2023 15:21

ДУШАНБЕ, 27.12.2023. /АМИТ «Ховар»/. Имрӯз бахшида ба 115-солагии Қаҳрамони Тоҷикистон, аллома Бобоҷон Ғафуров дар Муассисаи нашриявии «Ирфон» таҳти унвони «Шахси хирадманд» бо иштироки олимону донишмандон ва собиқадорони соҳаи табъу нашр конференсияи илмӣ—назариявӣ баргузор гардид, хабар доданд ба АМИТ «Ховар» дар нашриёти «Ирфон».

Зимни ҳамоиш гуфта шуд, ки дар таърихи зиёда аз шашҳазорсолаи миллати тоҷик садҳо чеҳраҳои мондагоре ҳастанд, ки нақши онҳо барои пойдории миллат, посдории илму фарҳанг, худшиносиву худогоҳии мардум ва ободии сарзамини аҷдодӣ басе арзишманд мебошад.

Яке аз чунин чеҳраҳои барҷастаи давраи навтарини таърихи миллати тоҷик, мутафаккири барҷаста, аллома Бобоҷон Ғафуров мебошад, ки дар рушди иқтисодиву иҷтимоии Тоҷикистон, инкишофи илму фарҳанги муосири ҷумҳурӣ ва илми шарқшиносии асри ХХ саҳми бисёр муассир гузоштааст.

Изҳор гардид, ки Бобоҷон Fафуров ҳаёт ва фаъолияти гуногунҷанбаи худро на танҳо ба пешрафти иқтисодиёту маънавиёти  халқи Тоҷикистон бахшидааст, балки ҳамчун олим ва сиёсатмадори оқил умри хешро сарфи озодиву истиқлол ва рушди илму тамаддуни бисёр давлатҳои Шарқ низ намудааст. «Хизматҳои ӯ дар роҳи ба ҳам наздик сохтани тамаддунҳо ва таҳкими сулҳ дар сайёра бо медали тиллои Шурои умумиҷаҳонии сулҳ қадршиносӣ шудаанд. Ӯ ҳамчунин яке аз аввалин шахсоне мебошад, ки бо Ҷоизаи байналмилалии ба номи Ҷавоҳирлол Неҳру сарфароз гардидааст.

Дар конференсияи илмӣ-назариявӣ нависанда, журналист ва собиқадори матбуот Саидмурод Рабизода оид ба «Саҳми Бобоҷон Ғафуров дар рушди энергетикаи тоҷик», мудири шуъбаи  китобҳои тиб, техника, кишоварзӣ ва саноат Лайлои Файзиддин оид ба «Бобоҷон Ғафуров ва хизматҳои беназири ӯ дар рушди илми таърихшиносии тоҷик» ва дигарон маъруза намуданд. Аз ҷумла, изҳор шуд, ки  Бобоҷон Ғафуров ҳамчун мутафаккири барҷастаи точик дар асоси садҳо далели холисонаи илмӣ дар шоҳасари худ ба ҷаҳониён тавонист исбот намояд, ки миллати фарҳангиву тамаддунофари тоҷик бо доштани чунин таърихи пурифтихор, мероси ғании илмиву адабӣ ва анъанаву арзишҳои асилу пурбор ҳаргиз ба таърихсозӣ, яъне таҳрифи огоҳонаи таърих ва афзалиятхоҳиву бузургтарошии бебунёд эҳтиёҷ надорад.

Хизмати дигари барҷастаи Бобоҷон Ғафуров он аст, ки бо заҳмату талошҳои ӯ дар Тоҷикистон мутахассисони баландпояи илми таърихшиносӣ тарбия ёфта, ба камол расиданд.

Бо ташаббуси академик Бобоҷон Ғафуров солҳои 1963 – 1965 бори аввал асари илмии «Таърихи халқи тоҷик» дар се ҷилд ва панҷ китоб омода ва нашр гардид, ки дар ҳаёти илмиву фарҳангии миллати мо рӯйдоди бесобиқа буд.

АКС: Муассисаи нашриявии «Ирфон»

Декабрь 27, 2023 15:21

Хабарҳои дигари ин бахш

Барои мукофотонидани ғолибони Озмуни ҷумҳуриявии «Шоҳномахонӣ» 2 миллиону 660 ҳазор сомонӣ ҷудо карда мешавад
ТУҲФАИ АРЗАНДАИ ПРЕЗИДЕНТИ ТОҶИКИСТОН. Ба беш аз 57 ҳазор оилаи шаҳри Ваҳдат «Шоҳнома» тақдим мегардад
ИЛМ ДАР БАЛАНДИИ ЗИЁДА АЗ 5000 МЕТР. Дар калонтарин пиряхи Тоҷикистон — Ванҷях таҳқиқоти илмӣ гузаронида шуд
Академияи миллии илмҳои Тоҷикистон бо Донишгоҳи давлатии омӯзгории Шинҷони Чин ҳамкориро тақвият медиҳад
Ёдгориҳои нодири тамаддуни тоҷикон дар Осорхонаи миллии Чин ба намоиш гузошта шуданд
Аз ҷониби нашриёти «Адиб» чор китоб ба нашр расид
Туҳфаи арзишманди Пешвои миллат — китоби «Шоҳнома» ба ноҳияи Файзобод расид
Байни консерваторияҳои Тоҷикистон ва Чин Ёддошти тафоҳум ба имзо расид
Намояндагони Шурои байналмилалии ҳунармандӣ бо намунаҳои сӯзании Панҷакент шинос шуданд
Сокинони шаҳри Роғун соҳиби туҳфаи Президенти Тоҷикистон — «Шоҳнома»-и Абулқосим Фирдавсӣ гардиданд
«АНДАЛЕБ-2025». Дар Панҷакент даври шаҳрии фестивал- озмуни ҷумҳуриявии телевизионӣ доир шуд
Намояндаи Тоҷикистон дар ҳамоиши тарғибгарони илм дар Чин иштирок намуд