БЕМОРИИ ДИАБЕТИ ҚАНД ВА РОҲҲОИ ПЕШГИРИИ ОН. Вобаста ба он дар Донишгоҳи миллии Тоҷикистон ҳамоиш доир шуд

ДУШАНБЕ, 26.01.2024. /АМИТ «Ховар»/. Имрӯз дар Донишгоҳи миллии Тоҷикистон бо мақсади татбиқи бандҳои «Барномаи пешгирии фарбеҳӣ ва ташаккули ғизои солим дар Ҷумҳурии Тоҷикистон» ва «Барномаи миллии пешгирӣ, ташхис ва муолиҷаи диабети қанд дар Ҷумҳурии Тоҷикистон» дар мавзуи «Бемории диабети қанд ва роҳҳои пешгирии он» ҳамоиши илмӣ-назариявӣ баргузор гардид. Дар ин хусус АМИТ «Ховар» бо истинод ба Донишгоҳи миллӣ хабар медиҳад.

Ҳамоиши илмӣ-назариявӣ бо тамошои намоишгоҳи дастовардҳои илмию таълимии донишгоҳ оғоз шуд.

Таъкид шуд, ки тибқи таҳлилҳои оморӣ, дар мамлакат шумораи беморони дорои диабети қанд рӯ ба афзоиш буда, баррасӣ ва пешгирӣ аз он мавзуи рӯз мебошад.

Президенти Ҷумҳурии Тоҷикистон муҳтарам Эмомалӣ Раҳмон солимии ҷомеаро зери сиёсати махсус қарор дода, гуфтаанд, ки «саломатии аҳолӣ ва ҳифзи иҷтимоии шаҳрвандон яке аз омилҳои муҳимтарини рушди иҷтимоиву иқтисодии мамлакат ба ҳисоб меравад».

Таъкид шуд, ки сабабҳои пайдоиши бемории диабети қанд ирсият, фарбеҳии зиёд, тарсу ҳаяҷон, камҳаракатӣ, атеросклерози рагҳо, бемории фишорбаландии хун, бемории ҷигар ва гурдаҳо мебошад.

Пешгирии таъсири бад гузоштани бемории диабети қанд- ин парҳез намудан аз истеъмоли ғизоҳои бирёну серравған, шӯру тунд мебошад. Ҳамзамон ҳар шахс бояд вазни худро дар меъёри муътадил нигоҳ дошта, ба фаъолияти ҷисмонӣ машғул шавад.

АКС: Донишгоҳи миллии Тоҷикистон