Ҳамкории Агентии назорати давлатии молиявӣ ва мубориза бо коррупсия ва Дафтари Ҳамоҳангсози доимии СММ дар Тоҷикистон баррасӣ шуд

ДУШАНБЕ, 02.02.2024. /АМИТ «Ховар»/. Директори Агентии назорати  давлатии молиявӣ ва мубориза бо коррупсияи Ҷумҳурии Тоҷикистон Сулаймон Султонзода бо роҳбари Дафтари Ҳамоҳангсози доимии Созмони Милали Муттаҳид дар Тоҷикистон Кавилмадам Рамасвами Парвати мулоқот намуд.

Дар мулоқот таъкид гардид, ки баъди ба даст овардани Истиқлолияти давлатӣ бо ташаббус ва дастгирии Созмони Милали Муттаҳид ва намояндагиҳои он дар Ҷумҳурии Тоҷикистон лоиҳаҳо ва барномаҳои зиёд ҷиҳати рушди соҳаҳои иқтисодӣ, иҷтимоӣ, фарҳангӣ ва дигар самтҳои афзалиятнок амалӣ гардонида шуда, нақши ин Созмон дар инкишофи иқтисодиёти ҷумҳурӣ муҳим арзёбӣ мегардад.

Ҷонибҳо доир ба ҳолат ва дурнамои рушди ҳамкории муштарак байни Агентӣ ва Дафтари Ҳамоҳангсози доимии Созмони Милали Муттаҳид дар Тоҷикистон муколамаи судманд анҷом дода, дар ин замина таклифу пешниҳодҳо ҷиҳати андешидани тадбирҳои иловагӣ дар самти муқовимат ба коррупсия манзур гардонида шуданд.

АКС: Агентии назорати давлатии молиявӣ ва мубориза бо коррупсияи Ҷумҳурии Тоҷикистон