Намояндагони Донишгоҳи миллии Тоҷикистон бо мақсади табодули таҷриба ба Ҷопон сафар намуданд

ДУШАНБЕ, 05.02.2024. /АМИТ «Ховар»/. Бо мақсади омӯзиши таҷрибаи пешқадам ва тақвият бахшидан ба таълими фанҳои табиатшиносӣ, дақиқ ва риёзӣ ҳайати Донишгоҳи миллии Тоҷикистон бо роҳбарии ректори донишгоҳ, профессор Эмомалӣ Насриддинзода ба Ҷопон сафар намуда,  бо фаъолияти  марказҳои илмию технологияҳои Ҷопон шинос мешавад.  Дар ин хусус ба АМИТ «Ховар» дар Донишгоҳи миллӣ хабар доданд.

Сафар ба раванди омӯзиши таҷрибаи пешқадам ва тақвият бахшидан ба таълими фанҳои табиатшиносӣ, дақиқ ва риёзӣ   мусоидат менамояд.

Дар оғози сафар ҳайати Ҷумҳурии Тоҷикистон бо фаъолияти Сафорати Ҷумҳурии Тоҷикистон дар Ҷопон шинос шуд. Зимнан таъкид гардид, ки муносибатҳои дипломатӣ байни Ҷумҳурии Тоҷикистон ва Ҷопон 2 феврали соли 1992 барқарор гардида,  Сафорати Ҷопон дар Ҷумҳурии Тоҷикистон 26 январи соли 2002 ва Сафорати Ҷумҳурии Тоҷикистон дар Ҷопон 28 ноябри соли 2007 ифтитоҳ ёфтааст.

Сипас вохӯрии ҳайати донишгоҳ дар дафтари марказии Агентии Ҷопон оид ба ҳамкории байналмилалӣ (JICA) бо намояндагони Департаменти Осиёи Шарқӣ ва Марказии ин Агентӣ доир гардид. Дар мулоқот ҷонибҳо дар самти густариш бахшидани ҳамкории илмию таълимӣ ва технологӣ табодули афкор намуданд.

АКС: Донишгоҳи миллии Тоҷикистон