Пешвои миллат Эмомалӣ Раҳмон: «Ойинҳои наврӯзӣ аҳли башарро ба таҳаммулгароӣ, бунёдкориву созандагӣ ҳидоят менамоянд»

ДУШАНБЕ, 21.03.2024. /АМИТ «Ховар»/. Ойинҳои наврӯзӣ сарчашмаи бузурги ахлоқиву тарбиявӣ мебошанд ва аҳли башарро ба таҳаммулгароӣ, бунёдкориву созандагӣ, яъне офаридани зебоӣ ва зебоипарастӣ ҳидоят менамоянд. Чунин изҳор доштанд Президенти Тоҷикистон дар Паёми шодбошиашон ба ифтихори Наврӯзи ҷаҳонӣ.

Ба гуфтаи Сарвари давлат, дар айёми Наврӯз ва фасли баҳор пӯшидани либосҳои миллии идона, тозаву озода намудани хонаву кошона, кӯчаву хиёбон, боғу гулгашт ва маҳалли зист аз ойинҳои зебоипарастии ниёгонамон маншаъ мегирад. «Мо бояд ин ойину арзишҳоро ҳамарӯза риоя намоем, муҳити зист, яъне кӯчаву хиёбон, деҳаву маҳалли зист, шаҳру ноҳия, инчунин роҳҳои мамлакатамонро ҳамеша тозаву озода нигоҳ дорем ва сарзамини аҷдодиамонро боз ҳам сарсабзу хуррам ва дилкашу хушнамо гардонем»,-баён доштанд Пешвои миллат.

Ба таъкиди Сарвари давлат, ин корҳо баёнгари тамаддуни деринаи мо ҳамчун миллати ободгару созанда мебошанд.

Ҳамчунин Президенти мамлакат хотирнишон намуданд, ки дар фарҳанги тоҷикон амалҳои некиву накукорӣ ва ботину қалби пок доштан анъанаи дерина буда, аз шиори аҷдоди некномамон – пиндори нек, гуфтори нек ва рафтори нек сарчашма мегиранд.

АКС: АМИТ «Ховар»