Вазири кишоварзии Тоҷикистон вобаста ба тақвияти корҳои саҳроӣ бо деҳқонони шаҳри Конибодом суҳбат намуд

ДУШАНБЕ, 29.03.2024. /АМИТ «Ховар»/. Дар шаҳри Конибодом бо иштироки Вазири кишоварзии мамлакат Қурбон Ҳакимзода деҳқонону хоҷагидорон кишти пунбадонаро оғоз намуданд, хабар медиҳад АМИТ «Ховар» бо истинод ба маркази матбуот ва иттилооти Вазорати кишоварзии Тоҷикистон.

Вазири кишоварзии Тоҷикистон ва Президенти Академияи илмҳои кишоварзии Тоҷикистон бо мақсади дар маҳал дида баромадан ва тақвияти корҳои саҳроӣ бо масъулин ва кишоварзони шаҳри Конибодом суҳбат намуданд.

Ҳангоми мулоқот ба масъулин ва кишоварзон аз ҷониби Вазири кишоварзии мамлакат оид ба иҷрои дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баҳри таъмини амнияти озуқаворӣ, захираи маҳсулоти истеъмолӣ, истифодаи самараноки замин, аз ҷумла заминҳои наздиҳавлигию президентӣ, истифодаи тухмиҳои хушсифат, риояи агротехникии зироат, пешгирӣ ва мубориза бар зидди касалию ҳашароти зараррасон, коркарди химиёвии зироати кишоварзӣ, майдони зироат ва боғу токзор маслиҳату тавсияҳои мушаххас дода шуданд.

АКС: Маркази матбуот ва иттилооти Вазорати кишоварзии Ҷумҳурии Тоҷикистон