Занону модарони тоҷик дар ҷомеа мақому мавқеи сазовор доранд

ДУШАНБЕ, 08.03.2024 /АМИТ «Ховар»/. Дар Кумитаи давлатии идораи замин ва геодезии Ҷумҳурии Тоҷикистон бахшида ба Рӯзи Модар маҷлиси тантанавӣ баргузор шуд, хабар медиҳад АМИТ «Ховар» бо истинод ба ин  кумита.

Раиси Кумитаи давлатии идораи замин ва геодезӣ Ориф Хоҷазода изҳор дошт, ки давлату Ҳукумати Тоҷикистон таҳти роҳбарии хирадмандонаи Пешвои миллат ҳамеша мақому манзалат ва ҳурмату эҳтироми Зан-Модарро ба таври шоиста қадрдонӣ менамоянд.

Таъкид гардид, ки маҳз бо шарофати истиқлолияти давлатӣ бо ташаббус ва роҳнамоии Президенти Ҷумҳурии Тоҷикистон дар ҷумҳурӣ барои баланд бардоштани мақоми зан дар ҷомеа ва таъмини ҳуқуқу имконияти баробари мардону занон дар сатҳи сиёсати давлатии Тоҷикистон тадбирҳо амалӣ шуда, ин раванд бобарор идома дорад.

Дар ин замина Президенти мамлакат муҳтарам Эмомалӣ Раҳмон дар Паём ба Маҷлиси Олии ҷумҳурӣ 28 декабри соли 2023 таъкид намуда буданд, ки «мо дар даврони соҳибистиқлолӣ мақоми занонро дар ҷомеа марҳала ба марҳала баланд бардошта, барои онҳо шароити муносиби фаъолият фароҳам овардем. Имрӯз занону духтарони тоҷик ба хотири рушди ҳамаи соҳаҳои ҳаёти ҷомеа ва давлат, аз ҷумла дар сафи Қувваҳои Мусаллаҳ ва мақомоти ҳифзи ҳуқуқ содиқона хизмат менамоянд».

Гуфта шуд, ки занон-модарони тоҷик дар ҷомеа мақому мавқеи сазовор доранд ва арзишҳои оиладорӣ, инсонӣ ва миллиро дар байни фарзандонашон ва ҷамъият бо масъулияти баланд тарғиб менамоянд.

Дар ҷамъомад ба собиқадорони меҳнат ки солҳои дароз дар дастгоҳи марказӣ, корхонаву муассисаҳои системаи Кумитаи давлатӣ ва мақомоти идораи замин дар маҳал фаъолияти пурсамар намуда,  ҳоло давлати пирӣ меронанд, туҳфаҳои идона тақдим гардид.

Ҳофизони хушнавои тоҷик бо сурудҳои дилнишин ба чорабинии идона шукуҳи тоза бахшиданд.

АКС: Кумитаи давлатии идораи замин ва геодезии Ҷумҳурии Тоҷикистон