Дар Рим Форуми сармоягузории Тоҷикистон ва Италия баргузор мегардад
![](https://khovar.tj/wp-content/uploads/2024/04/Sulton-Rahimzoda.jpg)
ДУШАНБЕ, 04.04.2024 /АМИТ «Ховар»/. Нимаи дуюми моҳи апрел дар Рим Форуми сармоягузории Тоҷикистон ва Италия баргузор мегардад. Масъалаи омодагӣ ба форуми сармоягузорӣ дар мулоқоти Раиси Кумитаи давлатии сармоягузорӣ ва идораи амволи давлатии ҷумҳурӣ Султон Раҳимзода бо Сафири Ҷумҳурии Италия дар Ҷумҳурии Тоҷикистон Агостино Пинна дар Душанбе баррасӣ гардид.
Ба АМИТ «Ховар» дар Кумитаи давлатии сармоягузорӣ ва идораи амволи давлатии Ҷумҳурии Тоҷикистон иттилоъ доданд, ки зимни мулоқот ҳамзамон вазъи ҳамкории Тоҷикистон ва Италия дар самтҳои иқтисодию сармоягузорӣ, табодули таҷриба дар самтҳои ҷалби ширкатҳои италиявӣ ба Тоҷикистон, баргузории чорабиниҳои минтақавӣ дар самтҳои тиҷоратӣ ва рушди долонҳои нақлиётӣ баррасӣ гардид.
Таъкид шуд, ки баргузории Форуми сармоягузории Тоҷикистон ва Италия барои муаррифии имконияти сармоягузории Тоҷикистон ба ширкатҳои италиявӣ ва ҷалби сармояи итолиёвӣ ба Тоҷикистон мусоидат менамояд.
Ҷонибҳо барои тақвияти ҳамкории минбаъда изҳори омодагӣ намуданд.
АКС: Кумитаи давлатии сармоягузорӣ ва идораи амволи давлатии Ҷумҳурии Тоҷикистон