Дар Боғи «Ирам» намоишгоҳи ҷумҳуриявии хайриявии гулу растанӣ баргузор шуд

ДУШАНБЕ, 26.04.2024 /АМИТ «Ховар»/. Дар Боғи «Ирам»-и шаҳри Душанбе таҳти унвони «Некӣ бикор» намоишгоҳи ҷумҳуриявии хайриявии гулу растанӣ баргузор гардид.

Тавре АМИТ «Ховар» бо истинод ба Сарраёсати ҳифзи муҳити зист дар шаҳри Душанбе хабар медиҳад, чорабинӣ ба Соли маърифати экологӣ дар шаҳри Душанбе ва пешбурди энергетикаи «сабз» дар Тоҷикистон бахшида шуда, ҳадафи он аз ҷалби таваҷҷуҳи ҷомеа ба масъалаҳои ҳифзи табиат, инчунин мушкилоти бемории саратон дар байни занон иборат буд.

Намоишгоҳи хайриявии гулҳо, ки соли дуюм аст баргузор мешавад, гулпарварон ва мутахассисони соҳаро бо имконияти фурӯши маҳсулот ва табодули таҷриба муттаҳид менамояд.

Дарсҳои маҳорат аз ҷониби гулпарварон ва флористҳои касбӣ гузаронида шуда, миқдори зиёди маҳсулоти марбут ба гулпарварӣ ва нигоҳубини растанӣ низ ба намоиш ва фурӯш пешниҳод карда шуд.

Дар доираи барномаи намоишгоҳ барои мактаббачагон озмуни расми кӯдакона- «Ман табиатро дӯст медорам», озмуни ҳунарҳои аз маводи партов сохташуда – «Сайёраро эҳтиёт кунед» ва видеоролик – «Сайёраи тоза» гузаронида шуд. Маблағҳои аз чорабинӣ ҷамъшуда ба лоиҳаҳои пешгирии саратон дар байни занони Ҷумҳурии Тоҷикистон равона мешаванд.

АКС: Сарраёсати ҳифзи муҳити зист дар шаҳри Душанбе