Дар Душанбе масъалаи содироти маҳсулоти кишоварзӣ баррасӣ гардид

ДУШАНБЕ, 16.05.2024 /АМИТ «Ховар»/. Дар чор моҳи имсол аз вилояти Хатлони Ҷумҳурии Тоҷикистон ба Ҷумҳурии Қазоқистон 182 тонна пиёз, 20 тонна пиёзи хушк, 551 тонна карам, 340 тонна сабзӣ, 88 тонна картошка, 20612 тонна зардолуи хушк ва чормағз, 1075 тонна ангур, 18 тонна лимӯ, 120 тонна лӯбиё содирот шуд. Ин матлаб 15 май зимни вохӯрии Вазири кишоварзии Ҷумҳурии Тоҷикистон Қурбон Ҳакимзода бо Вазири савдо ва ҳамгироии Ҷумҳурии Қазоқистон Арман Шаккалиев баён гардид. Дар ин хусус ба АМИТ «Ховар» дар Вазорати кишоварзии Тоҷикистон иттилоъ доданд.

Ҷонибҳо зимни мулоқот барои ба роҳ мондани ҳамкории судманд оид ба содироту воридоти молу маҳсулот, бунёди марказҳои хариди яклухт, ташкили ярмарка-фурӯши маҳсулоти кишоварзӣ ва табодули таҷриба изҳори назар намуданд.

Иттилоъ дода шуд, ки соли 2023 аз Ҷумҳурии Тоҷикистон ба Қазоқистон 142 ҳазор тонна меваю сабзавот содирот шудааст.

 АКС: Вазорати кишоварзии Ҷумҳурии Тоҷикистон