ТОҶИКИСТОНУ ЧИН. Дар Душанбе маркаҳои ҷашнӣ муаррифӣ гардид

Июль 4, 2024 09:21

ДУШАНБЕ, 03.07.2024 /АМИТ «Ховар»/. 2 июл дар шаҳри Душанбе маросими муаррифии маркаҳои ҷашнӣ таҳти унвони «Тоҷикистону Чин: кишварҳои қадими Роҳи абрешим бо таъриху фарҳанги нодир» баргузор гардид, иттилоъ доданд ба АМИТ «Ховар» дар Вазорати фарҳанги мамлакат.

Гуфта шуд, ки маркаҳои мазкур дар доираи сафари давлатии Раиси Ҷумҳурии Мадрумии Чин Си Ҷинпин ба Ҷумҳурии Тоҷикистон омода гардидааст.

Иттилоъ дода шуд, ки марка на танҳо як намуд тамғаи оддӣ, балки як асари миниатюрӣ ва як услуби нодири муаррифии таъриху фарҳанг аст. Онҳо аз ҷониби рассомони машҳури тоҷик бо тарҳҳои зебо ва чопи аъло таҳия карда шудаанд. Дар маркаҳои мазкур дӯстии ду давлат, фарҳанг ва тамаддуни ин ду мамлакат таҷассум гардидааст.

Тавре Сафири Фавқулода ва Мухтори Ҷумҳурии Мардумии Чин дар Ҷумҳурии Тоҷикистон Тсзи Шумин иброз намуд, Чин ва Тоҷикистон дорои таърих ва фарҳангӣ бою ғанӣ ва манзараҳои зебои табиӣ мебошанд. Дар тӯли ҳазорсолаҳо байни тоҷикону чиниҳо, ин ду миллати бостонӣ табодул дар роҳи Роҳи Абрешим идома дошт.

Ҳамчунин гуфта шуд, ки соли 2013 Раиси Ҷумҳурии Мардуми Чин Си Ҷинпин ташаббуси «Як камарбанд, як роҳ»-ро барои эҳёи роҳи бостонии Роҳи Абрешим манзур намуд. Тоҷикистон яке аз аввалин давлатҳоест, ки ташаббуси бунёди «Камарбанд ва роҳ»-ро дастгирӣ намуда, дар он иштироки фаъолона дорад.

Чин ва Тоҷикистон дар раванди ҳамкорӣ барои эҳёи «Як камарбанд, як роҳ» пайваста эътимоди сиёсии мутақобиларо таҳким бахшида, ҳамкории амалиро амиқтар намуда, дар табодули фарҳангӣ ва омӯзиши мутақобилаи байни тамаддунҳо ба пешравиҳои назаррас ноил гардиданд.

Бояд гуфт, ки Чин ва Тоҷикистон барои бунёди ҷомеаи ояндаи муштарак якҷоя талош варзида, дар мубодила ва омӯзиши мутақобилаи байни тамаддунҳо намунаи дурахшон нишон медиҳанд.

«Дар як тамғаи кучак, дар ду сантиметри мураббаъ як ҷаҳон маънӣ ҷой дода мешавад, ки дар он рушди мамлакат, дигаргуниҳои иҷтимоӣ ва мероси фарҳангӣ инъикос ёфтааст. Мо бовар дорем, ки тамғаҳои имрӯз нашршуда дар остонаи сафари давлатии дар пеш истода ба сарзамини шумо дар раванди бунёди ҷомеаи Чину Тоҷикистон бо ояндаи муштарак ҳамчун яке аз рӯйдодҳои муҳим нақши назаррас хоҳад гузошт», — афзуд Тсзи Шумин.

Бояд гуфт, ки Ҷумҳурии Мардумии Чин дар байни шарикони байналмилалии Тоҷикистон мақоми хосса дорад. Робитаҳои байни халқҳо таърихи куҳан дошта, ҳанӯз аз замони Роҳи бузурги абрешим маншаъ мегиранд ва тӯли беш аз се даҳсола ривоҷу равнақ ёфтаанд.

АКС: Вазорати фарҳанги Ҷумҳурии Тоҷикистон

 

Июль 4, 2024 09:21

Хабарҳои дигари ин бахш

Инна Блюшенко аз Швейтсария: «Мақсад дорам забони ширину шевои тоҷикиро омӯзам»
Президенти Академияи миллии илмҳои Тоҷикистон дар Конференсияи байналмилалии «Илм барои бехатарии ҷаҳон» иштирок намуд
35-СОЛАГИИ ИСТИҚЛОЛИЯТИ ДАВЛАТӢ. Дар Чойхонаи миллӣ барои дар як шабонарӯз қабули 5000 мизоҷ шароит фароҳам оварда мешавад
Ба пешвози 700-солагии Ҳофизи Шерозӣ дар Тоҷикистон барномаҳои фарҳангию маърифатӣ доир мешаванд
ШАҲРИСТОНИ ҲУЛБУК. Бозёфтҳои аз ин ёдгорӣ пайдогардида намунаи санъати олии ҳунармандӣ буда, нотакрор мебошанд
«КОРВОНИ КИТОБ». Ба китобхонаҳои шаҳру ноҳияҳои Бадахшон беш аз 6 ҳазор нусха китоб дастрас мегардад
АМИТ «Ховар» ва ҶСП «Ширкати байнидавлатии телевизион ва радиои «Мир»» Ёддошти тафоҳум ба имзо расониданд
Дар Душанбе мубодилаи барномаҳои фарҳангӣ ва намоиши филмҳо байни Тоҷикистон ва Чин баргузор гардид
Дар мавзуи ташаккул ва рушди синошиносӣ дар Тоҷикистон конфронси илмӣ доир гардид
Рӯзҳои фарҳанги Ҷумҳурии Тоҷикистон дар Ҷумҳурии Тотористони Федератсияи Русия доир гардид
Ду озмоишгоҳи Институти химияи Академияи миллии илмҳои Тоҷикистон бо технологияи муосир муҷаҳҳаз карда шуд
Рӯзҳои фарҳанги Ҷумҳурии Тоҷикистон дар Федератсияи Русия идома доранд