СОЛИ МАЪРИФАТИ ҲУҚУҚӢ. Савияи дониши ҳуқуқии донишҷӯёни Донишгоҳи давлатии Кӯлоб баланд бардошта мешавад

ДУШАНБЕ, 16.10.2024 /АМИТ «Ховар»/. Имрӯз дар Донишгоҳи давлатии Кӯлоб ба номи Абуабдуллоҳи Рӯдакӣ бахшида ба Соли маърифати ҳуқуқӣ ва баланд бардоштани савияи дониши ҳуқуқии донишҷӯён ва дар руҳияи худшиносиву меҳандӯстӣ тарбия намудани шаҳрвандон ҳамоиш баргузор гардид. Дар ин хусус ба АМИТ «Ховар» дар Донишгоҳи давлатии Кӯлоб хабар доданд.

Зимни ҳамоиш таъкид шуд, ки омӯзиши фарҳангу таърихи миллат дар рушди худшиносии миллӣ, ҳувият ва ҷаҳонбинии хонандагон нақши бориз дошта, ҳадафи асосии он ба такмили маънавии донишҷӯён дар давраи ҷаҳонишавӣ равона гардидааст. Зеро дар давлати муосир ҳалли муаммоҳои амнияти миллӣ аз ҳарвақта дида, барои таъмини ваҳдату якпорчагӣ, нигоҳ доштани асолат ва ягонагии фарҳангу маданият аҳамияти аввалиндараҷа дорад.

Ректори донишгоҳ иброз намуд, ки барои пешгирии ҳолатҳои номатлуб, таълиму тарбияи дуруст, дар роҳи садоқату эҳтиром ба фарҳангу арзишҳои миллӣ ва худшиносиву ватандӯстӣ ба камол расидани насли наврасу ҷавон моро зарур меояд, ки таърихи гузашта ва фарҳанги пурғановати ниёгонамонро омӯзем ва дар иҷрои уҳдадориҳои вазифавиамон масъулиятшиносона амал намоем.

АКС: Донишгоҳи давлатии Кӯлоб