Вазири энергетика ва Сафири Ҷопон дар Тоҷикистон бо фаъолияти Неругоҳи барқи обии «Намангут» шинос шуданд

ДУШАНБЕ, 04.11.2024 /АМИТ «Ховар»/. Бо мақсади ҷалби бештари сармоя барои рушди устувори соҳаи энергетика ба Вилояти Мухтори Кӯҳистони Бадахшон Вазири энергетика ва захираҳои оби Ҷумҳурии Тоҷикистон Далер Ҷумъа бо Сафири Ҷопон дар Ҷумҳурии Тоҷикистон Тосихиро Аики бо Неругоҳи барқи обии «Намангут», воқеъ дар ноҳияи Ишкошими Вилояти Мухтори Кӯҳистони Бадахшон шинос гардиданд.

АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон иттилоъ медиҳад, ки ҳадафи сафар ба ин минтақа ҷалби бештари сармоя барои рушди устувори соҳаи энергетика, махсусан таъмини сокинони дурдасти мамлакат бо неруи барқ мебошад.

Зимни шиносоӣ иттилоъ дода шуд, ки Неругоҳи барқи обии «Намангут» соли 1974 ба истифода дода шуда, иқтидори лоиҳавии ду дастгоҳи барқтавлидкунандаи он ба 2500 кВт баробар аст. Дар айни замон иқтидори истеҳсолии Неругоҳи барқи обии «Намангут» 1,6 МВт мебошад.

Неругоҳи «Намангут» аз нигоҳи иқтидор сеюмин неругоҳи калон дар Бадахшон арзёбӣ мегардад.

АКС:Вазорати энергетика ва захираҳои оби Ҷумҳурии Тоҷикистон