ЧЕМПИОНАТИ ОСИЁ. Варзишгари ҷавони тоҷик Меҳрон Шафиев бар муштзани қирғиз ғолиб омад

ДУШАНБЕ, 04.12.2024. /АМИТ «Ховар»/. Дар Чемпионати Осиё оид ба бокс дар шаҳри Чиангмайи Тайиланд 9 муштзани тоҷик иштирок доранд. Дар рӯзи чоруми мусобиқа варзишгари Тоҷикистон Меҳрон Шафиев дар вазни то 48 кг рақобат намуд. Дар ин хусус шореҳи варзиши АМИТ «Ховар» хабар медиҳад.

Меҳрон Шафиев дар даври аввали мусобиқот бо намояндаи Қирғизистон Анваржан Ходжиев рақобат кард. Бо қарори якдилонаи доварон дар ин рақобат пирӯзӣ бо ҳисоби калони 5 бар 0 насиби Меҳрон Шафиев гардид.

Меҳрон Шафиев дар даври дуюм рақобатро идома медиҳад.

Дар се рӯзи гузашта муштзанони тоҷик Шаҳобҷон Шукуров дар вазни 71 кг ва Миҷгона Самадова дар вазни то 57 кг ғалаба карда, ба даври дуюм роҳ ёфтанд. Абдумалик Болтаев дар вазни 80 кг дар даври аввал ноком гардид.

Ёдовар мешавем, ки Чемпионати Осиё оид ба бокс дар шаҳри Чиангмайи Тайиланд аз 28 ноябр то 12 декабр байни беҳтарин муштзанони қораи Осиё баргузор мегардад. Дар ин мусобиқаи сатҳи баланд беш аз 200 муштзан (132 мард ва 82 зан) аз 21 давлати Осиё иштирок доранд.

АКС аз манбаъҳои боз