НИШАСТИ МАТБУОТӢ. Дар Донишгоҳи техникии Тоҷикистон қариб 700 шаҳрванди хориҷӣ таҳсил менамояд

ДУШАНБЕ, 30.01.2025 /АМИТ «Ховар»/. «Дар айни замон дар Донишгоҳи техникии Тоҷикистон ба номи академик Муҳаммад Осимӣ 694 донишҷӯ аз Узбекистон, Русия, Афғонистон, Чин, Туркманистон ва Ҳиндустон дар зинаҳои таҳсили бакалавр, магистратура ва доктор PhD ба таҳсил фаро гирифта шудаанд, ки ин аз мавҷудияти пойгоҳи мустаҳками моддию техникӣ ва муҳайё намудани шароити муносиби таҳсил дар донишгоҳ дарак медиҳад»,-иттилоъ дода шуд 29 январ зимни нишасти матбуотӣ дар донишгоҳ.

Гуфта шуд, ки солҳои охир таваҷҷуҳи довталабони хориҷӣ ба ихтисосҳои самти энергетика, роҳи оҳан, коркард ва истифодаи конҳои нафту газ, сохтмон ва меъморӣ зиёд гардидааст.

Ректори Донишгоҳи техникии Тоҷикистон Қудрат Давлатзода иброз намуд, ки «донишгоҳ дар соҳаҳои муҳимтарини замони муосир, бахусус энергетика, нақлиёт, сохтмон ва меъморӣ, саноат ва дигар соҳаҳои калидӣ мутахассисоне омода менамояд, ки ба меъёрҳои баландтарини замон ҷавобгӯ буда, диққати довталабони хориҷиро бисёртар ҷалб намудаанд.

Донишгоҳ бо назардошти таваҷҷуҳи бештари довталабон, густариши ҳамкории байналмилалӣ ва дар ин замина омода намудани мутахассисони баландтахассус аз рӯйи ихтисосҳои таъмини барқ, коркард ва истифодаи конҳои нафту газ дар шакли 2+3 бо Донишгоҳи давлатии техникии Тошканд барномаи таълимии муштарак ташкил намуд».

АКС: АМИТ «Ховар»