Ҳамкории Палатаи ҳисоби Тоҷикистон бо Ташкилоти байналмилалии рушди ИНТОСАЙ тақвият меёбад

ДУШАНБЕ, 21.02.2025 /АМИТ «Ховар»/. 18 феврал дар Палатаи ҳисоби Ҷумҳурии Тоҷикистон вохӯрии раиси Палатаи ҳисоб Ҷамшед Каримзода бо коршиноси Ташкилоти байналмилалии рушди ИНТОСАЙ (INTOSAI)  Назгул Албанова баргузор шуд. Дар ин хусус АМИТ «Ховар» бо истинод ба бахши иттилоот ва кор бо воситаҳои ахбори оммаи Палатаи ҳисоб хабар медиҳад.

Дар мулоқот ҷонибҳо аз ҷараёни ҳамкорӣ изҳори қаноатмандӣ намуда, масъалаи густариши ҳамкории аз ин бештарро дар доираи лоиҳаи «Дастгирии Палатаи ҳисоби Ҷумҳурии Тоҷикистон барои солҳои 2023- 2025» таъкид намуданд.

Бояд гуфт, ки Ташкилоти байналмилалии  ИНТОСАЙ худмухтор, мустақил, ғайрисиёсӣ ва ғайридавлатӣ буда, ҳамчун ташкилоти доимамалкунанда барои мубодилаи донишу малака ва таҷриба дар соҳаи аудити берунӣ байни мақомоти олии назорати молиявӣ дар саросари ҷаҳон фаъолият менамояд.

Мақсади асосии ИНТОСАЙ  таъмин намудани аудиторон- аъзои ин ташкилот бо мубодилаи иттилооти мавриди таваҷҷуҳи тарафайн, маълумот оид ба рушди муосир дар фаъолияти аудиторӣ, истифодаи стандартҳои касбӣ ва методология ба ҳисоб меравад.

АКС: Палатаи ҳисоби Ҷумҳурии Тоҷикистон