Дар деҳаи Лолазори ноҳияи Деваштич муассисаи томактабӣ сохта мешавад

ДУШАНБЕ, 30.03.2025 /АМИТ «Ховар»/. Дар деҳаи Лолазори Ҷамоати деҳоти Яхтани ноҳияи Деваштич муассисаи томактабӣ сохта мешавад. Тавре АМИТ «Ховар» бо истинод ба Мақомоти иҷроияи ҳокимияти давлатии ноҳияи Деваштич хабар медиҳад, бино аз ҷониби сокинону соҳибкорони маҳаллӣ сохта шуда, тибқи лоиҳа аз ду ошёна иборат аст ва барои 200 нафар тарбиятгиранда пешбинӣ шудааст.

Бояд гуфт, ки дар Ҷамоати деҳоти Яхтани ин ноҳия қариб 20 ҳазор аҳолӣ истиқомат дошта, наврасон дар 9 мактаб ва хурдсолон дар 3 кӯдакистон ба таълиму тарбия фаро гирифта шудаанд. Бинобар афзоиш ёфтани аҳолӣ ва зиёд шудани талабот ба бунёди ин муассиса санги асос гузошта шуд.

Ҳоло дар ноҳияи Деваштич 8 кӯдакистон фаъолият дошта, 1430 нафар ба муассисаҳои томактабӣ фаро гирифта шудаанд.

АКС: Мақомоти иҷроияи ҳокимияти давлатии ноҳияи Деваштич